Policia e Shtetit doli me një dekaratë duke bërë të qartë se nuk do lejojë më protesta që nga e hëna e tutje, e kjo në kuadër të masave COVID.
Sipas saj, çfarë u lejua për 5 ditë-netë rresht, ishte vetëm një tolerancë nga një sensitet i kuptueshëm shoqëror pas vrasjes së 25-vjeçarit Klodian Rasha.
“Policia e Shtetit është shumë e vetëdijshme për të drejtën e protestës dhe lirinë e pacenueshme të tubimit.
Në kushtet e sensibilizimit të madh të shoqërisë pas tragjedisë së djalit 25-vjeçar që humbi fatalisht jetën, nga dora e një efektivi policie, Policia e Shtetit e ka pasur të pamundur ta anashkalojë ndjeshmërinë popullore për të mos lejuar asnjë tubim.
Por tanimë kur drejtësia po kryen detyrën e saj ndaj autorit të vrasjes dhe kur protestat kanë degraduar në organizime që kanë për qëllim cenimin e rendit publik dhe pronës publike, Policia e Shtetit nuk do të tolerojë asnjë grumbullim që bie ndesh me kornizën aktuale të masave shtrënguese”, thuhet në deklaratë.
Më tej, kujtohen kufizimet COVID, për të cilat policia do duhet të veprojë.
Bëjmë apel të mbahen parasysh nga të gjithë, kërkesat e akteve që i përcaktojnë masat shtrënguese për:
– Ndalimin e grumbullimeve me më shumë se 10 persona në vende të mbyllura apo të hapura, konferenca, tubime, mbledhje partiake, ceremoni festive etj. Mbajtjen e detyruar të barrierave mbrojtëse (maska), në ambientet jashtë shtëpisë;
– Ruajtjen e distancimit fizik gjatë veprimtarisë së përditshme;
– Zbatimin e masave nga administrata publike dhe në automjetet e transportit publik;
– Ndalimin e muzikës pas orës 20:00;
– Ndalimin e aktivitetit të bareve, lokaleve, restoranteve e ‘fast food’ pas orës 22:00 deri në orën 06:00;
– Kufizimin e lëvizjes së popullatës nga ora 22:00 deri në orën 06:00;
– Zbatimin e protokolleve në institucionet arsimore, në të cilat vazhdon kryerja e mësimit;
– Marrjen e masave administrative dhe atyre penale në rast të shkeljeve dhe mos-zbatimit të masave të veçanta në periudhën e pandemisë së COVID-19. /tesheshi.com/
