Autoritetet e Rendit në Shqipëri kanë përgënjeshtruar të dhënën e servirur nga PD-ja, sipas së cilës, vëllai i deputetit socialist Fatmir Xhafa, Agron Xhafa, kërkohet ndërkombëtarisht nga një urdhërarrest i lëshuar prej autoriteve venezueliane.
“Policia e Shtetit konfirmon se nuk ka asnjë urdhër-kërkimi apo urdhër-arresti për shtetasin e përmendur në deklaratën e subjektit politik Partia Demokratike.
Nga kontrolli i plotë dhe i hollësishëm në sistemin e kërkimit të Interpol nuk figuron asnjë material, kërkesë për informacion, verifikim apo urdhër arresti nga asnjë Zyrë homologe për shtetasin Agron Xhafa.
Policia e Shtetit fton Partinë Demokratike të ndalë abuzimet. Në rast se PD kërkon të vërtetën, është e ftuar t’i drejtohet autoriteteve, te cilat janë të gatshme në çdo kohë për të ofruar informacionin e kërkuar”, thuhet në deklaratën e Policisë së Shtetit. /tesheshi.com/
