Policia e Kosovës ka deaktivizuar mjetin shpërthyes që u gjet sot në ballkonin e shtëpisë së Murat Mehës, kryetarit të Komisionit Shtetëror për shënjimin e kufirit me Malin e Zi, në lagjen Dardania në Prishtinë.
Murat Meha ka thënë se ky sulm është bërë prej dorës së zgjatur që tenton t’i rrezikojë jetën dhe familjen.
“Ky është një sulm ndaj familjes time, që po bëhet prej dorëz së zgjatur që po mundohen të rrezikojnë gjithçka, madje edhe familjen time. Këta që e kanë bërë këtë nuk e kanë menduar shtetin dhe ardhmërinë e Kosovës, kjo na bën më të fuqishëm që proceset t’i shtyjmë përpara. Materiali që cakton kufirin me Malin e Zi nuk është vetëm në Kosovë, por në të gjitha qendrat më të mëdha të botës, dhe askush nuk mund të asgjësojë apo të bëjë alibi se kufiri mund të jetë në një vijë tjetër,” ka thënë Meha.
Kryeministri Mustafa: akt i papranueshëm
Edhe kryeministri Isa Mustafa ka reaguar, duke thënë se një akt i tillë është i papranueshëm, se këta njerëz nuk ia duan të mirën Kosovës.
“Te shtëpia e Murat Mehës është hedhur një mjet shpërthyes. Është një akt i papranueshëm. Aktet e tilla që rrezikojnë jetën e familjeve tregojnë më së miri se kemi të bëjmë me njerëz që nuk ia dojnë të mirën Kosovës. Ata e rrezikojnë të ardhmen e Kosovës,” ka deklaruar Mustafa.
Për këtë mjet shpërthyes, policia u njoftua rreth orës 14:00, kur dolën njësitë përkatëse të saj. /tesheshi.com/
