Nga Ahmet Zani
Kushdo që udhëton në aksin rrugor Milot – Peshkopi do të relaksohet nga bukuritë natyrore të fshatit turisik në Skuraj. Pushuesit e shumtë shijojnë freskinë e natyrës nëpër lokalet përgjatë bregut të lumit të pastër, si dhe gatimet tradicionale vendase.
E aty ku dhe fillon lugina e Shkopetit, një urë e varur pasarelë do t’ja shtonte dhe më shumë bukuritë fshatit, si dhe pushuesve nga veçoritë e saj. Pasarela është e ndërtuar vite më parë. Ajo u mundësonte lidhjet e banorëve të fshatrave të Skurajt dhe Shkopetit me disa fshatra të tjerë nga malësia e Kurbinit.
Ura është e lidhur me disa kavo metalike të fuqishme, dhe bazamenti me paisje druri karakteristike, saqë dhe çiftet e sapomartuar preferonin klipet pikërisht tek kjo pasarele, ku ndërthuren pamjet e bukura të lumit, maleve, pemëve të shumllojshme.
Por prej disa vitesh, pasarela është lënë në të harruar nga qveritarët, ndonëse banorëve u premtohej rikostruksioni i saj çdo fushatë elektorale.
Dërrasat e drunjta janë dëmtuar, dhe lëvizjet e banorëve bëhen me vështirësi dhe rrezik për ta, konkretisht tek fëmijët e shkollave, apo dhe të moshuarit. Dora e një biznesmeni nga Miloti mundësoi afro pesë vite më parë një rikonstruksion, por tashmë është rikthyer në gjendje të mjerueshme.
Kur e sheh, të vjen të thuash: “po me urën ç’patën xhanëm?!”
Kjo batutë filmi i referohet rastit kur gjermanët hidhnin në erë nëj urë fshati, ndërsa tani ajo u referohet njerëzve me pushtet që asnjë urë nuk janë në gjendje ta rregullojnë apo mirëmbajnë…/tesheshi.com/
