Një analizë të posaçme i ka kushtuar France24 fitimit të kampionatit francez nga PSG-ja të dielën që shkoi për të katërtin vit radhazi. Dhe pyetja që e përshkon tërë analizën është ajo nëse supremacia e PSG-së po e vret futbollin francez.
“Eshtë hera e parë në histori që një ekip e ka siguruar titullin aq herët,” citohet të ketë thënë ish-kryeredaktori i së përditshmes sportive L’Equipe, Stephane Bitton. Me të vërtetë Lioni fitoi shtatë tituj nga 2002-shi në 2008-ën, por skuadra ishte e kapshme dhe në javën e fundit. Përpos faktit se Lioni apo skuadra të tjera që dominuan në vite do t’i humbnin shpesh trofetë e tjera karshi rivalëve.
Dinastitë e futbollit francez nuk janë gjë e pandeshur thotë analiza, duke përmendur dominimin e Sent-Etjenit mes viteve ’60 dhe ‘70, apo të Olimpikut të Marsejës, por, siç pohojnë specialistët njëzëri, spikatja verbuese e PSG-së është e paprecedent.
“Eshtë një dominim atletik, por gjithashtu një dominim financiar,” thotë Pierre-Louis Basse, një gazetar sportiv francez i njohur. “PSG-ja mund të blejë lojtarët më të mirë nga e gjithë bota.”
Basse vë në dukje se ndërsa Paris Sent-Zhërmeni nuk është ekipi më i pasur në Europë, zhbalancimi në
kampionatin francez është më i madh se në vendet e tjera. “Në Spanjë ka tre apo katër skuadra që luftojnë për kreun; edhe në Gjermani e në Premier League ka ende rivalitet.”
“Eshtë sikur të ketë dy kampionate të ndryshme. Në njërin është PSG-ja, e në tjetrin është çdonjë tjetër.”
Klubi i kryeqytetit francez u shpall fitues i kampionatit tetë javë para mbarimit të tij, duke lënë pas Monakon me 25 pikë më pak. Dhe analiza e France24-ës e sheh të mishëruar shkatërrimin e kundërshtarëve nga PSG-ja te fjalët e Zllatan Ibrahimoviçit, lojtarit më të mirë të kampionëve, e që ka lënë të kuptohet se do të largohet në fund të sezonit: “Nëse e zëvendësojnë kullën Eifel me një statujë timen, unë do të qëndroj te PSG-ja. Mund ta premtoj këtë!” /tesheshi.com/
