Nga Blendi Gashi
Ndërsa kanë mbetur edhe gjashtë ditë deri në seancën plenare ku përfundimisht do të mësohet fati i Demarkacionit me Malin e Zi, krerët më të lartë të shtetit, ka kohë që kanë nisur presionet ndaj deputetëve që të japin votën pro për marrëveshjen në fjalë.
Tre krerët më të lartë të vendit, presidenti Hashim Thaçi, kryeministri Isa Mustafa dhe kryekuvendari Kadri Veseli, ditëve të fundit kanë filluar një fushatë të paparë, ku në çdo paraqitje publike, qoftë konfereca, tryeza, paraqitje në media, u bëjnë thirrje publike deputetëve të votojnë pro Demarkacionit.
Duke u thirrur në emër të SHBA-së, drejtuesit e shtetit mundohen të bëjnë presion sa më të madh ndaj deputetëve të caktuar, për më tepër thonë se ata që nuk e votojnë Demarkacionin janë edhe kundër Amerikës pasi që shteti në fjalë publikisht ka deklaruar se Kosova nuk humb territor nga shënjimi i kufirit me Malin e Zi.
Por, a po e shkelin Kushtetutën e vendit, presidenti, kryeministri e kryekuvendari me thirrjet dhe presionin që po u bëjnë në vazhdimësi deputetëve për ta votuar marrëveshjen?!
Neni 70 i Kushtetutës ku flitet për mandatin e deputetit thotë:
“Deputetët e Kuvendit janë përfaqësues të popullit dhe nuk i nënshtrohen asnjë mandati detyrues”.
Kurse, neni 74 i Kushtetutës së Republikës së Kosovës thotë:
“Deputetët e Kuvendit të Kosovës ushtrojnë funksionin e tyre në interesin më të mirë të Republikës së Kosovës dhe në pajtim me këtë Kushtetutë, ligjet dhe rregullat e procedurës së Kuvendit”.
“Krerët e shtetit po bëjnë shkelje flagrante të Kushtetutës”
Drejtues opozitar dhe njohës të kushtetueshmërisë në vend, thonë se krerët e shtetit po e shkelin Kushtetutën me thirrjet dhe presionet që po bëjnë ndaj deputetëve për ta votuar marrëveshjen për Demarkacionin.
Kryetari i Aleancës për Ardhmërinë e Kosovës (AAK), Ramush Haradinaj, thotë se thirrjet e presidentit, kryeministrit dhe kryekuvendarit për të imponuar votimin e demarkacionit me Malin e zi, është shkelje flagrante e Kushtetutës.
“Neni 70, paragrafi i parë në lidhje me nenin 74 të Kushtetutës së Republikës së Kosovës, siguron se ndaj deputetëve nuk mund të ushtrohet presion; nuk ka mandat të detyrueshëm dhe se deputetët përfaqësojnë sovranin e votojnë, duke u bazuar në Kushtetutë, në ligje dhe në Rregullore të Kuvendit.
Pushtetet në Kosovë janë të ndara dhe Kosova nuk është Monarki, prandaj kthejuni punëve tuaja dhe mos u bëni presion deputetëve.
Në këtë vend gjithmonë ka pasur disa njerëz që për pare e për interesa kanë qenë në gjendje ta shesin edhe babën edhe nanën, por shumica gjithmonë ka qenë në krah të kësaj Kosove.
Deputetët e Kosovës nuk u janë nënshtruar shantazheve as në kohën e Millosheviqit dhe kanë ditur që edhe nën rrethim, edhe formalisht, t’i nisin themelet e kësaj Republike”, ka deklaruar Haradinaj.
Njohësi i kushtetueshmërisë në vend, Riza Smaka thotë se krerët e shtetit me presionin që po bëjnë mbi deputetët, po bëjnë shkelje flagrante të Kushtetutës.
Ai thotë se po të ndodhte një gjë e tillë në shtetet demokratike, do të kërkohej menjëherë dorëheqja e tyre.
“As presidenti, kryeministri por as kryekuvendari nuk kanë auttorizim të bëjnë imponime, presione mbi deputetët, siç po bëjnë ditët e fundit, sepse një gjë e tillë është në kundërshtim me Kushtetuen, statusin e deptuetit dhe ligjin për deputetin. Kjo është shkelje flagrante e Kushtetës dhe e rendit juridik.
Në shtetet demokratike, të së drejtës, një veprim i tillë do të ishte i mjaftushëm të shkarkohen drejtuesit e shtetit pa kurrfarë diskutimi. Është e patolerueshme të bëhen joshje me privilegje të caktuara për t’i përfituar votat për Demarkacionin. Kjo është e paparë, kjo ndodh vetëm në Kosovë. Deputetët duhet të votojnë të lirë, ashtu si dëshirojnë ata, kjo është rregull elementare”, thotë Smaka, për tesheshi.com.
Ndryshe, më datë 1 shtator do të mbahet seanca plenare ku një prej pikave të rendit të ditës do të jetë projektligji për ratifikimin e marrëveshjes për shënjimin e kufirit me Malin e Zi. /tesheshi.com/
