Shkodra është tronditur orët e drekës të kësaj të diele nga një atentat ndaj kreut të Policisë Bashkiake Mentor Hasanaj, i cili ka qënë duke ecur me automjetin e punës.
Mësohet se në makinë ka qenë dhe babai i tij Xhelal Hasanaj, i plagosur rëndë, si dhe gruaja Vjollca Hasanaj, 28-vjeçe, për fat pa asnjë pasojë nga plumbat.
Ata janë qëlluar nga një motor në ecje, siç sqarohet dhe në komunikatën e policisë.
“Më datë 11.10.2020, rreth orës 12:30, në aksin rrugor Shkodër-Koplik, një person i paidentifikuar që qarkullonte me motomjet, ka qëlluar me armë zjarri në drejtim të mjetit të Policisë bashkiake Malësia e Madhe ku udhëtonin shtetasit M. H. 37 vjeç, V. H. 28 vjeçe dhe Xh. H. 70 vjeç, banues në Malësinë e Madhe.
Si pasojë janë plagosur shtetasit M. H, me detyrë Shefi i Policisë bashkiake në Malësinë e Madhe dhe Xh. H., i ati i tij, të cilët janë dërguar në Spitalin Rajonal Shkodër për ndihmë mjeksore
Shërbimet e Policisë me të marrë njoftim kanë shkuar menjëherë në vendngjarje dhe kanë ngritur pika kontrolli në akset rrugore dhe po kontrollohet zona ku dyshohet se ka lëvizur autori.
Në ndihmë të Policisë Vendore kanë shkuar edhe forcat e FNSH Shkodër ku vijon kontrolli masiv i territorit për të bërë të mundur kapjen e autorit.
Grupi hetimor ndodhet në vendngjarje dhe nën drejtimin e Prokurorisë po vijon punën intensive për grumbullimin dhe fiksimin e çdo prove që do t’i shërbejë zbardhjes së ngjarjes dhe indetifikimin e autorit”, thuhet në raportimin policor.
Për momentin, nuk ka asnjë pistë se përse mund të jenë qëlluar Hasanajt. /tesheshi.com/
