Nga Blendi Gashi
Një ditë me telefonatën e shumëpritur dhe më të rëndësishmen botërore, Trump-Putin, u realizua edhe një e tillë por në nivel të Ballkanit, bëhet fjalë për telefonatën Thaçi-Vuçiç.
Ndërsa dy të parët lavdëruan njëri-tjetrin, dhe biseda mes tyre u cilësua si “embrioni i ndërtimit të marrëdhënieve të reja mes Rusisë dhe SHBA-së”, e njëjta nuk mund të thuhet për bisedën e dytë.
Thaçi tha se u bisedua për normalizimin e marrëdhënieve mes dy vendeve pas tensioneve të fundit.
Duke parë realizimin e kësaj telefonate të papritur, përveç që shtrohet dilema për çfarë u bisedua në të vërtetë mes tyre, po ashtu Thaçi nuk tregoi se kush qe i pari që i telefonoi njëri-tjetrit, dhe në ç’gjuhë biseduan?
Pavarëisht këtyre enigmave, kjo telefonatë siç duket nuk i ka pëlqyer aspak krahut të kryeministrit Mustafa, derisa opozita e ironizon me presidentin, duke thënë se ai po mburret me bisedat që po zhvillon me pasardhës të Sllobodan Millosheviçit dhe po ndërhynë në punë të kreut të ekzekutivit.
Bajram Gecaj, këshilltar i Mustafës ka deklaruar dje për mediat kosovare se “kryeministri nuk ka pas nevojë të bisedojë përtej asaj që është biseduar në Bruksel”, duke shtuar se “Thaçi flet me kë të dojë në telefon”.
Nga kjo deklaratë mund të kuptohet qartë se për telefonatën në fjalë Mustafa ka kuptuar nga mediat. dhe sigurisht si jo rrallë herë, që mund të jetë ndierë i “tradhëtuar” nga Thaçi i cili vazhdon të mbetet politikani më aktiv, pavarësisht nëse shkel komptencat e tij si president.
“Lutje për mëshirë pasardhësit të Millosheviçit”
Sekretari organizativ i Lëvizjes Vetëvendosje, Dardan Molliqaj, përmes një shkrimi në Facebook ka ironizuar me presidentin duke thënë se ai po mburret me “një telefonatë në të cilën i lutet për mëshirë pasardhësit të Millosheviqit”.
Molliqaj, shton se në anën tjetër, Vuçiçi i bën dëme të vazhdueshme Kosovës dhe nuk mburret para popullit serb për këtë.
“Vuçiq e kontrollon 1/3 e territorit tonë, ndërton mure, bllokon ura, arreston çlirimtarë, etj. dhe nuk mburret me këtë para qytetarëve të tij por përkundrazi e vazhdon edhe më shumë fashizmin ndaj Kosovës”, thotë Mulliqaj.
“Puç presidencial”
Bilall Sherifin, sekretarin e NISMA për Kosovën biseda e Thaçit me Vuçiçin “është ose ndërrim funksionesh, ose puç presidencial”.
Edhe Sherifi ka ironizuar me presidentin duke thënë se “nuk kuptuam se a janë marrë vesh për t’i dhënë fund ‘luftës’ apo janë marrë vesh veç për një armëpushim të përkohshëm”.
“Edhe diçka, mos rastësisht Hashim Thaçi dhe Isa Mustafa kanë bërë rokadë të funksioneve, veçse ende nuk e kanë informuar publikun, apo bëhet fjalë për një ‘PUÇ’ presidencial?”, ka shkruar Sherifi në llogarinë e tij në Facebook.
Ndryshe, për dallim nga Thaçi, deri më tani nuk ka dal me një deklaratë për të thënë versionin e tij për telefonatën në fjalë. /tesheshi.com/
