Kompania farmaceutike amerikane Pfizer po fillon një program pilot për shpërndarjen e vaksinës eksperimentale kundër COVID-19 në katër shtete të SHBA, duke u përpjekur të gjejë një zgjidhje për shpërndarjen efikase në masë të vaksinës që do të duhet të ruhet në pajisje të veçanta frigoriferike në temperatura ultra të ulëta.
Vaksina anti-kovide e Pfizer do të duhet të transportohet dhe ruhet në minus 70 gradë Celsius, raporton Reuters.
“Shpresojmë që ky program pilot të shërbejë si model për shtetet e tjera të SHBA dhe qeveritë e huaja që përgatiten të zbatojnë një program efektiv vaksinimi kundër COVID-19”, tha kompania në Nju Jork.
Në programin pilot, vaksina do të transportohet në Teksas, New Mexico, Rhode Island dhe Tenesi.
Kompanitë farmaceutike Pfizer e SHBA dhe BioNTech e Gjermanisë thanë javën e kaluar se vaksina e tyre eksperimentale ishte më shumë se 90 përqind efektive në parandalimin e COVID-19, bazuar në të dhënat fillestare nga një studim i madh, një fitore e madhe në luftën kundër pandemisë.
Përqindja e lartë e atyre që janë të mbrojtur i bën gjetjet bindëse.
Rregullatorët thanë se ata do të miratonin një vaksinë që është vetëm 50 për qind efektive – duke mbrojtur gjysmën e atyre që e marrin atë.
Sipas parashikimeve, të dy kompanitë mund të dorëzojnë deri në 50 milion doza të vaksinave në të gjithë botën deri në fund të vitit dhe deri në 1.3 miliardë doza vitin e ardhshëm. /tesheshi.com/
