Katër notarët amerikanë që pretenduan gjatë Lojërave Olimpike të Rios se janë grabitur, ndërkohë që vetë kishin kryer akte vandale, janë pezulluar nga Komiteti Olimpik i SHBA-ve (USOC).
Kryesori prej tyre, Ryan Lochte, është pezulluar për 10 muaj nga sporti, çka do të thotë se ai nuk do të mund të marrë pjesë gjatë kësaj periudhe në asnjë lloj aktiviteti noti.
Tre notarët e tjerë, Gunnar Bentz, Jimmy Feigen dhe Jack Conger, janë pezulluar me nga katër muaj. Dënimi u është dhënë për thyerje të kodit të sjelljes.
“Sjellja e këtyre sportistëve nuk ishte e pranueshme,” ka deklaruar drejtuesi i Komitetit Olimpik të SHBA-ve, Scott Blackmun.
Ryan Lochte pranoi se e kishte tepruar shumë me atë çfarë kishte rrëfyer fillimisht.
Policia braziliane e paditi atë në fund të muajit të shkuar për dëshmi të rreme, ndërsa ai mund të gjykohet në mungesë.
Lochte ka humbur dhe mbështetjen e sponsorëve të ndryshëm pas skandalit në Lojërat Olimpike. /tesheshi.com/
