Një muaj e gjysmë pas emërimit në krye te ministrisë së Drejtësisë, Petrit Vasili paralajmëron se reforma në Drejtësi ka përballë një ngërç edhe më serioz sesa ai politik. I ftuar në “Arena” të Dritan Hilës, ministri thotë se kushtet dhe puritanizmi ekstrem ka bërë që edhe kur procesi politik të mos jetë pengesë, të mos kemi kandidatë edhe për Këshillin e Lartë Gjyqësor edhe për Këshillin e Lartë të Prokurorisë.
Në të njëjtin frymë debati, ministri Vasili, njëheraz numri dy i LSI – analizoi ndryshimet në Qeveri duke hedhur poshtë zërat se pas shkarkimit të Saimir Tahiri qëndron presioni i Ilir Metës. Për sa i përket kërkesës së opozitës për mundësinë e një qeverie teknike, sekretari i Përgjithshëm i LSI-së thotë e rëndësishme është mos të ketë ultimatum.
“Sigurisht, kërkesa për qeveri teknike, është një kërkesë maksimaliste. Ideja ka qenë se meqë kemi probleme të mëdha siç kemi problemet e drejtësisë, të kthehet opozita sa më parë me frymë mirëkuptimi në Parlament. Duam s’duam, kemi ca çështje të mbetura pezull që na lidhin me opozitën”, tha ai.
“Kemi detyrë relativisht edhe më të vështirë, pasi mazhorancat kanë pushtet në dorë, sigurisht ka edhe detyra në raste të caktuara, kompromise të arsyeshme, që të tregojë tolerancë maksimale. Dhe kësaj tolerance nuk duhet t’i shmangemi sa të kemi mundësi. Të hulumtojmë çdo rrugë për të arritur tek kompromisi, duke përjashtuar ekstremizmat, nga do që të vijnë”, tha Vasili.
I pyetur nëse ka ardhur tashmë moment që Ilir Meta të plotësojë ambicjen e tij për kryeministër, Vasili u shpreh se në këto momente fokusi i LSI është që vendi të hyjë në zgjedhje. /tesheshi.com/
