Peshkopët katolikë të Gjermanisë dënuan trajtimin e Shteteve të Bashkuara ndaj Ukrainës si një “skandal” në fund të asamblesë së tyre pranverore të këtij viti.
Politikat e administratës së Presidentit Donald Trump, ranë dakord ata, janë “thjesht të papërgjegjshme”, tha Georg Bätzing, president i Konferencës së Peshkopëve Gjerman.
“Përpjekja për t’u afruar me Putinin tani, duke ushtruar presion dhe madje duke përdorur shantazhe kur bëhet fjalë për furnizimet me lëndë të parë, në thelb do të thotë t’ia dorëzosh Ukrainën Rusisë agresore. Ky është një skandal, për të qenë i qartë,” vuri në dukje Bätzing.
Peshkopët nuk duan asgjë më shumë se paqe, “por jo me çmimin që do t’i imponohet Ukrainës”.
“Një ‘paqe e diktuar’ do të rriste më tepër rreziqet për stabilitetin e të gjithë kontinentit tonë.”
Peshkopi kritikoi gjithashtu reduktimin e ndihmës amerikane për zonat e krizës si “rrugë krejtësisht të gabuar”.
Braktisja e Trumpit të rendit botëror liberal, të cilin SHBA-ja e ndërtoi kryesisht, është gjithashtu thellësisht shqetësuese, tha Bätzing.
Ukraina së fundmi pranoi në parim një armëpushim të shtyrë nga SHBA, i cili u prit me lehtësim në mbarë botën, raporton dpa.
Marrëdhëniet midis Ukrainës dhe Shteteve të Bashkuara më parë ishin përkeqësuar ndjeshëm pas një incidenti midis Trump dhe Presidentit Volodymyr Zelensky në Shtëpinë e Bardhë.
Megjithatë, Rusia nuk e ka pranuar ende armëpushimin. /tesheshi.com/
