Është vënë gurthemeli për ndërtimin e vendkalimit të ri të përbashkët kufitar ndërmjet Kosovës dhe Maqedonisë, “Stançiq- Bellanoc”.
Shefja e Zyrës së BE-së në Kosovë, Nataliya Apostolova, tha se hapja e kësaj pike tregon punën e përbashkët të dyja vendeve në rrugën e tyre drejt integrimeve evropiane.
“Shpresoj se do të vazhdoni të punoni bashkërisht për implementimin e punëve dhe më tej në kooperimin e arritjeve të synimeve për të mirën e qytetarëve të dyja vendeve dhe të gjithë rajonit”, tha Apostolova.
Shefi i delegacionit të BE-së në Shkup, ambasadori Samuel Zbogar, theksoi se kjo pikë kufitare do të ketë ndikim pozitiv për zhvillimin ekonomik të banorëve të zonave lokale ndërmjet dy vendeve, por edhe për stabilitetin politik të rajonit të gjerë.
Ndërsa zv.kryeministri Enver Hoxhaj, pranoi se ka pasur vonesa për ndërtimin e kësaj pike kufitare me Maqedoninë, por shtoi se më në fund ky projekt po realizohet duke zvogëluar dukshëm rrugën që banorët e këtyre zonave bënin në të kaluarën.
“Ka qenë një pritje, një shpresë, ëndërr, të cilët qytetarët e të dyja komunave dhe vendeve e kanë pritur me padurim dhe sot po e shndërrojmë këtë ëndërr në realitet të ri. Falënderoj shumë njerëz, personalitete që kanë dhënë kontribut të madh në jetësimin e këtij projekti, pikës kufitare, por dua të them një vlerësim personal. Është një temë që më ka përcjell nga viti 2011, nuk ka pasur takim me delegacionet e Maqedonisë që nuk kanë pasur temë të bisedës sonë që të jetësohet ky projekt, sidomos nga viti 2013, kur e kemi nënshkruar marrëveshjen për hapjen e kësaj pike kufitare ndërmjet dy vendeve tona”, deklaroi Hoxhaj.
Ai me këtë rast ka porositur se kufijtë e shtetit të Kosovës janë të paprekshëm dhe të pacenueshëm.
“Hartat politike në Ballkan dhe kufijtë historikisht në këto dy-tre mijë vitet e fundit janë bërë dhe ribërë, por ne kemi qëndruar këtu si popull dhe kufijtë e sotëm të Republikës së Kosovës janë të paprekshëm, të pandryshuar dhe të pacenuar”, deklaroi Hoxhaj.
Kurse zv.kryetari i qeverisë së Maqedonisë për Çështje Evropiane, Bujar Osmani, tha se vendosja e këtij gurthemeli e bën këtë projekt më një dimension jashtëzakonisht të rëndësishëm politik edhe për marrëdhëniet e shkëlqyera mes dy vendeve, të cilat me këso projektesh sa vijnë e po thellohen.
Ai vuri në pah edhe rëndësinë që ka ky projekt për popullatën lokale të komunës së Likovës në Maqedoni si dhe të Gjilanit në Kosovë, por në përgjithësi edhe për popullatën vendore të kësaj ane.
Kujtojmë se kjo është pika e tretë e përbashkët ndërmjet Kosovës dhe Maqedonisë, por ajo e cila dallon këtë pikë është se ndërtohet në konceptin e menaxhuar të kufirit, me një pikë të përbashkët kufitare, e cila hyn në kategorinë e pikës A që nënkupton edhe për mallra dhe udhëtarë.
Faza e parë përfshin udhëtarët dhe automjetet dhe në të ardhmen e afërt do të ketë mundësi edhe për transportin e mallrave. /tesheshi.com/
