Festimet pas realizimit të ndonjë goli apo pas ndonjë triumfi janë gjë e zakonshme për gjithë futbollistët përpos në rastin e Mario Balotellit. Por, festimet e futbollistëve shpesh herë kanë ditur të jenë mjaft të çuditshme e mbi të gjitha edhe kontradiktore për faktin se kanë përzier sportin me politikën, gjë e cila është në kundërshtim të plotë me frymën sportive.
“Tesheshi.com” ua sjell pesë festimet naziste më të çuditshme që keni parë ndonjëherë:
1.Paolo Di Canio 
Ish-futbollisti i Lacios, italiani Paolo Di Canio është i njohur për problemet që ka shkaktuar brenda fushës së lojës dhe jashtë saj. Madje, futbollisti bëhet problem edhe atëherë kur feston. Di Canio kishte festuar dy herë në mënyrë naziste duke ngritur dorën lart sikurse lideri i dikurshëm Adolf Hitler. Njëherë e kishte bërë pas triumfit ndaj rivalit local, Romës në vitin 2005 dhe njëherë tjetër në vitin 2006 ndaj Livornos, skuadër kjo tradicionalisht e udhëhequr nga komunistët. “Jam fashist, por jo racist. Bëra përshëndetjen romake për t’I uruar tifozët e mi dhe gjithë ata që përkrahin idetë e mia. Kjo përshëndetje nuk duhet të jetë asnjëherë si akt i dhunës dhe më së paku i cilësuar si radikal”, kishte deklaruar Di Canio
2. Giorgos Katidis
Futbollisti i ri grek, Giorgos Katidis ka realizuar golin e tij më të rëndësishëm në karrierë tek AEK Athina, por në të njëjtën kohë edhe e ka humbur karrierën e tij për shkak të festimit të golit në mënyrën naziste. Lojtari, së pari, u dënua nga Federata e Futbollit të Greqisë për të mos luajtur më kurrë në fanelën e përfaqësueses e më pas edhe klubi i tij e largoi për te Novara. “Nuk e dija se çfarë do të thoshte ai festim. E kisha parë në disa filma dhe më pëlqeu, prandaj vendosa të festoja ashtu, por unë tani sinqerisht dua të kërkoj falje”, ishin fjalët e Katidis pas këtij skandali.
3. Përfaqësuesja e femrave të SHBA-ve
Gjatë kampionatit botëror të futbollit për femra të mbajtur në Gjermani gjatë vitit 2011, ekipi amerikan kishte përshëndetur publikun pas realizimit të një goli në mënyrën pothuajse naziste. Por, kjo është mohuar kategorikisht nga amerikanët. Madje, Amerika historikisht ka qenë kundër nazistëve pasi luftonte kundër saj në Luftën e Dytë Botërore.
- Mark Bosnich
Ish-portieri i Aston Villës, Mark Bosnich kishte bërë një gabim të rëndë në vitin 2006, kur gjatë ndeshjes kundër Tottenhamit, ai i provokoi tifozët rivalë me gjestin nazist, dorën e majtë të ngritur lart, ndërsa të djathtën mbi të. Tipike hitleriane. Bosnich kishte kërkuar falje për këtë akt të shëmtuar, megjithatë ishte gjobitur me 1 mijë funta nga federata e Futbollit Anglez.
- Mauro Zarate
Sulmuesi argjentinas Mauro Zarate gjatë sezonit të kaluar në Lazio pati një aventurë mjaft të mirë, por që në një moment mori kahje krejtësisht të kundërt. Për shkak të pezullimit, ai iu bashkua tifozëve “ultras” të Lacios, duke kënduar së bashku me ta dhe në një moment ai kishte ngritur dorën lart në përshëndetje naziste.
BONUS: Shaqiri e Mandzukic, gati sa nuk u burgosën
Salutimi ”ushtarak“ në ndeshjen e FC Bayernit kundër FC Nürnbergut i futbollistëve Mandzukic dhe Shaqiri mund t`u kushtonte atyre edhe ndjekjen penale! Pas golit të shënuar për FC Bayern, futbollisti kroat Mario Mandzukic thuhet të ketë përshëndetur publikun me një përshëndetje ushtarake. Dhe jo vetëm ai, po ngjashëm kishte vepruar edhe futbollisti me origjinë shqiptare Xherdan Shaqiri.
Kjo përshëndetje thuhej se i është dedikuar lirimit nga Haga të dy gjeneralëve kroatë të luftës, Ante Gotovina dhe Mladan Markac.
Të ballafaquar me mediat, të dy futbollistët patën hedhur poshtë këtë spekulim.
Mandzukic pati thënë: “Jam i dëshpëruar me atë çka është dashur të nxirret nga një përshëndetje e publikut. Kjo nuk ka të bëjë fare me politikën. Unë, thjesht kam vrapuar nga tribunat dhe i kam përshëndetur tifozët tanë”.
Ndërsa Shaqiri ishte shprehur: “Unë as që di ndonjë gjë për ndonjë gjeneral nga Kroacia. Unë vetëm e kam parë Marion dhe thjesht i jam bashkuar në festimin e golit”. /tesheshi.com/
