U përkujtua 10-vjetori i katër policëve të vrarë nga Dritan Dajti gjatë një operacioni në plazhin e Durrësit, krimi më i rëndë ndaj uniformale blu në tranzicion. Ka qenë ky rasti që nga mazhoranca, të hidhen akuza ndaj drejtësisë për mosndëshkim ende të këtij krimi, referuar procesit ndaj Dajtit.
“Kolegët tanë që tashmë prehen në altarin e kombit u ndanë prej nesh nga plumbat e krimit të organizuar. Dhe ende sot shpirti i tyre nuk gjen paqe deri në dhënien e drejtësisë së merituar për dorën vrastare.” deklaroi Aida Hajna, Zv.Drejtore e Policisë së Shtetit.
Ndërsa Zv/ministrja e Brendshme Rovena Doda apeloi me nëntekst të fortë politik, referuar opozitës:
“Të rreshtohen në krah të policisë së shtetit institucionet që sakrifikon më shumë e përditë deri në sakrifica sublime, por fatkeqësisht mbi supe jo rrallëherë kanë baltën e akuzave të pamerituara. Policia është dhe mbetet vetëm e shtetit, ndaj të duam policët dhe policinë”, tha nr.2 i Rendit. /tesheshi.com/
