Ndërkohë që përsëritja e zgjedhjeve presidenciale në Austri do të bëhet në tetor, anketimet e para kanë treguar se Norbert Hofer, kandidati i Partisë së Lirisë, kryeson me katër për qind ndaj rivalit të tij, Alexander Van der Bellen.
I porositur nga gazeta Oesterreich, anketimi i kryer nga Gallup-i e nxori Hofer-in, kandidatin e ekstremit të djathtë, me 52 për qind, kundrejt 48 përqindëve të kandidatit të mbështetur nga të gjelbërit, Van der Bellen.
Nëse Norbert Hofer fiton në zgjedhjet e 2 tetorit, vendi i tij mund të ndjekë shembullin e Britanisë së Madhe. Para një muaji Hofer-i deklaroi se në Austri mund të mbahej një referendum brenda një viti mbi anëtarësinë në BE po qe se blloku europian nuk hiqte dorë nga centralizimi politik.
Alexander Van der Bellen do të shpallej fitues në balotazhin e majit, me vetëm 0.6 për qind diferencë në vota ndaj kundërshtarit tejet të djathtë. Por Hofer do ta çonte në gjykatë rezultatin e zgjedhjeve, duke pretenduar për parregullsi në numërimin e votave. Gjykata Kushtetuese i dha të drejtë dhe i anuloi zgjedhjet, dhe tani, në përsëritjen e afërt të tyre, Norbert Hofer mund t’ia dalë në fitimin e tyre e të bëhet president i Austrisë. /tesheshi.com/
