Një përplasje po ndodh mes SPAK dhe gazetarit Artan Hoxha, pasi ky i fundit ka pohuar se në dëshmitë e Nuredin Dumanit ka dalë emri i Ilir Metës si porositës i një vrasjeje, asaj ndaj Aleksandër Ndokës, vëllait të ish-deputetit Arben Ndoka.
Për SPAK, kjo nuk është e vërtetë.
“Në vijim të interesimit të shtuar të mediave, në lidhje me deklarimin e gazetarit Artan Hoxha për sa i përket të dhënave të pretenduara si të deklaruara nga shtetasi nën hetim N.D. për Presidentin e Republikës së Shqipërisë, të transmetuar në televizionin Kombëtar Klan, në emisionin Opinion të datës 02.06.2022, sqarojmë opinionin publik se: Në deklarimet e dhëna në kuadër të procedimit penal nr.75/2022 që po heton Prokuroria e Posaçme, shtetasi nën hetim N.D., nuk ka deklaruar asnjë të dhënë në lidhje me Presidentin e Republikës së Shqipërisë. Duke marrë shkas nga ky rast, si dhe duke mbajtur në konsideratë edhe trajtimet që i janë bërë deklarimeve të shtetasit N.D. në emisione të ndryshme televizive, ftojmë mediat që të jenë të kujdesshme, të mbajnë në konsideratë ndjeshmërinë e kësaj çështje, të respektojnë viktimat dhe familjarët e tyre, si dhe faktin se çështja është në fazën e hetimit paraprak dhe Gjykata e Posaçme e Shkallës së Parë Për Korrupsionin dhe Krimin e Organizuar referuar nenit 103 të Kodit të Procedurës Penale ka vendosur ndalimin e publikimit të vendimit nr.42 datë 17.05.2022 (me objekt caktimin e masave të sigurimit)”, thuhet në deklaratën e SPAK.
Por gazetari Hoxha është i bindur në atë që ka pohuar.
“Unë e kam thënë dhe mbrëmë që Nuredin Dumani dhe Henrik Hoxha, dhe persona të tjerë kanë dhënë shumë deklarime. Vetëm në kuadër të atij procedimi janë bashkuar 18 procedime të tjera. SPAK duhet të ishte shumë i kujdesshëm dhe të mos kishte rrjedhje informacione.
Ata kanë dhënë deklarata dhe mbi deklarimet e tyre duhet të bëhen hetime të hollësishme. Uën kam thënë nuk e besoj këtë gjë, por ai e ka thënë këtë. Është e regjistruar me audio. Ai është i besueshëm për ngjarjet që ka qenë vetë, jo për ato që ka dëgjuar.
Nëse unë do t’i nxjerrë çfarë ka thënë ai, atëherë cili nga ata do të mbajë përgjegjësi nga ka rrjedhur ai informacion. Po po të nxjerr dëshminë unë, çfarë do thonë?! Shiko si reagojnë kur përmendet emri i një politikani, po pse nuk veprojnë për qytetarët?!”, ka argumentuar Hoxha. /tesheshi.com/
