Kreu i diplomacisë së Athinës, Nikos Kotzias dha dorëheqje nga posti i tij, detyrë që do të merret nga vetë kryeministri Tsipras.
“Kryeministri Aleksis Tsipras pranoi dorëheqjen e ministrit të jashtëm, Nikos Kotzias. E falënderojmë nxehtësisht për kontributin e tij në qeveri dhe ndaj vendit 3,5 vitet e fundit”, u tha në një njoftim zyrtar të qeverisë greke. Dorëheqja e Kotziasit thuhet se vjen pas një përplasjeje mes tij dhe kreut të Mbrojtjes Panos Kammenos. Ky i fundit, gjatë një vizite në Uashington është shprehur për shtyerjen e çështjes së emrit me Maqedoninë, gjë që me të cilën nuk ka qenë dakort Kotzias.
Mes të dyve thuhet se ka patur një përplasje të ashpër verbale, deri sa Kotzias ka vendosur të dorëhiqet.
Nikos Kotzias do të mbahet mend ndër shqiptarë si njeriu që u angazhua për një marrëveshje të re detare mes Tiranës dhe Athinës, si dhe për mbylljen e një kapitulli mosmarrëveshjes edhe për aspekte të tjera dypalëshe, ndonëse firmat përfundimtare ende nuk janë hedhur. /tesheshi.com/
