NATO dërgon në brigjet malazeze dy anije luftarake turke dhe një spanjolle, për të vëzhguar situatën pas provokimeve nga Moska dhe vizitës së pritshme në rajon të Kryeministrit rus, Dimitar Medvedev.
Në portin e Tivarit janë ankoruar tre luftanije që komandohen nga Kapiteni turk, Ramazan Kesgin.
Së bashku me anijet e flotës Detare Ushtarake të Malit të Zi, luftanijet e Aleancës së Atlantikut të Veriut do të zhvillojnë manovra të përbashkëta detare në vendin që i është bërë ftesë zyrtare për anëtarësimin në NATO.
Të ankoruar në portin e qytetin shqiptar të Malit të Zi-Tivar, ndodhen: luftanija që mban emrin e Admiralit Legjendar të Perandorisë Osmane, “Cezayrli Gazi Hasan Pasa”, anija “Edremit”, si dhe anija ushtarake spanjolle “Tambre”.
Kapiteni Kesgin the për mediat malazeze se “kjo vizitë është thjeshtë vazhdimi i misionit që ka nisur që në shtatorin e vitit të shkuar dhe tashmë Mali i Zi është një partner i rëndësishëm”.
Komandanti i Marinës së Malit të Zi, Darko Vukoviç tha se kjo është një vizitë historike, e cila kontribuon në forcimin e miqësisë dhe partneritetit me vendet anijet e të cilëve ka qenë pjesë e grupit detare të NATO-s.
Ai shtoi se vizita kontribuon në zhvillimin e mëtejshëm të aftësive operative të Marinës së Malit të Zi dhe ecurinë e procesit të trajnimit për misionet e ardhshme të përbashkëta në det.
Zëvendës shefi i shtabit të Komandës Operacioneve Detare të NATO-s, Arian Minderhoud tha se kjo është vizita e parë që bëhet në Mal të Zi, pas ftesës që NATO bëri për Malin e ZI më 2 dhjetor 2015.
Ai shtoi se promovimi i përbashkët i dialogut ushtarak dhe bashkëpunimit në mbështetje të sigurisë dhe stabilitetit detare duhet të vazhdojë.
/tesheshi.com/
