A do vijë dita që dhe banesat e bizneset ta kenë të detyruar sigurimin me ligj ashtu si dhe automjetet? Ka gjasa që po.
Pas përmbytjeve të radhës, ku shumë banesa e biznese duan tashmë një grusht me para për t’u rimëkëmbur, e ku të gjithë i kanë sytë nga shteti, kryeministri Rama e ka dhënë sinjalin e parë për këtë.
Ja ç’deklaroi së fundi Rama:
“Përparësi dhe marrja e nismës ligjore për sigurimin e banesave nga përmbytjet, bizneseve nga përmbytjet. Jemi ende i vetmi vend që nuk ka një masë të tillë në ligj dhe ku pastaj njerëzit e prekur mbeten në mëshirën e fatit dhe në pritje vetëm nga buxheti i shtetit që nuk mund të përballojë gjithçka e gjithmonë dhe pse këtë herë, sigurisht që do t’i përballojmë si dhe herën e kaluar të gjitha detyrimet që burojnë nga kjo krizë e rëndë. Po është shumë e rëndësishme që të gjithë qytetarët, sipërmarrësit të sensibilizohen dhe të kuptojnë se duhet si në çdo vend normal të marrin masa të sigurohen nga fatkeqësitë natyrore në mënyrë që dëmet të kompensohen plotësisht dhe në kohë reale në bazë të këtij mekanizmi”, tha Rama gjatë mbledhjes së Komitetit të Emergjencave. /tesheshi.com/
