Shirat dhe përmbytjet më të mëdha në 15 vite në Paraguaj, Uruguaj, Brazil e Argjentinë i kanë detyruar mbi 160.000 njerëz të evakuohen.
Efekti i dukurisë El Nino po ndjehet më shumë se kurrë në këto vende, ku tre prej lumenjve më të mëdhenj janë fryrë tej caqeve e mund të dalin nga shtrati.
Gjendje e jashtëzakonshme është shpallur në kryeqytetin e Paraguajit, Asuncion, dhe në shtatë rajone të tjera. Paraguaji është vendi më i prekur nga përmbytjet, çka ka sjellë dhe evakuimin e 130.000 banorëve. Një numër njerëzish raportohen të kenë humbur jetën nga rënia e pemëve, por nuk ka ende shifra të sakta.
Në Konkordia, në Argjentinë, kanë lënë shtëpitë 20.000 veta, ndërsa autoritetet lokale e përshkruajnë gjendjen si më të rëndën në pesë dekada.
Më i ulët është numri i të evakuuarve në Uruguaj. Shtëpitë i kanë lënë 9.000 persona, e autoritetet përkatëse lajmërojnë për ruajtje të nivelit të tanishëm të ujrave dhe në ditët pasardhëse.
Pak a shumë e njëjta gjendje është dhe në Brazil, ku në shtetin jugor të Rio Grande do Sul-it ka 1.800 të shpërngulur. /tesheshi.com/
