Bajerni i Mynihut është tani për të pestin sezon radhazi kampion i Gjermanisë, por kjo nuk i ndalon lojtarët e tij që të kenë të njëjtin angazhim në fushë, a thua se gjithçka është në pikëpyetje.
Përmbysje e çmendur e bavarezëve në fushën e Lajpcigut, skuadrës që e ndoqi më nga afër gjatë gjithë sezonit. Një javë para mbarimit të Bundeligës, Bajerni i Mynihut ka fituar 4-5 në Lajpcig ndaj skuadrës vendase me të njëjtin emër.
Lajpcigu kryesonte 4-2 gjer gjashtë minuta para fundit të lojës, por tre gola të udhëtuesve e kthyen rezultatin në favor të tyre.
Goli i Lewandowski-t në minutën e 84-t, i Alaba-së në të 91-tën dhe Robben-it në të 95-tën i dhanë fitoren 4-5 Bajernit.
Një tjetër takim me shumë gola qe ai në Bremen, ku Verderi humbi 3-5 karshi Hofenhajmit. Në vend të katërt, Hofenhajmi ka po aq pikë sa Borusia e Dortmundit e vendit të tretë, 61, që barazoi 1-1 në fushën e Augsburgut.
Hamburgu mori një pikë të çmuar në sekondat e fundit në përballjen në transfertë ndaj Shalkes. Barazimi 1-1 e lë Hamburgun në vend të 16-të, me 35 pikë. Po 1-1 barazoi dhe Volfsburgu ndaj Borusias së Mynshegladbahut. Volfsburgu i paraprin Hamburgut, me 37 pikë, dhe ndeshja e javës së fundit mes këtyre dy skuadrave, e cila do të luhet në Hamburg, do të përcaktojë qëndrimin në Bundesligë. /tesheshi.com/
