Kryeministri Ramush Haradinaj e kryekuvendari Kadri Veseli, kanë vlerësuar lartë heroizmin e komandantit Adem Jashari dhe familjes së tij për lirinë e vendit me rastin e 20-vjetorit të rënies heroike të tyre.
Veseli ka thënë se komandanti Adem Jashari besonte se ëndrra për liri ishte më e fortë se terrori.
“Sakrifica e Adem Jasharit dhe Familjes së tij është rast unik në historinë e njerëzimit. Mesazhi i saj u flet shekujve dhe gjithë popujve: Asgjë nuk është më e çmueshme sesa liria. “I nderuar dhe i përjetshëm qoftë kujtimi për Adem Jasharin, Familjen e tij dhe gjithë dëshmorët e lirisë”, deklaroi Veseli në seancën solemne të Kuvendit.
Edhe kryeministri Haradinaj tha se familja Jashari mbeti si rast unik për liri e dinjitet.
“Disa nga më të mirët tanë zgjodhën që jetën t’ia dhurojnë vendit. Të kenë rezistencën para dorëzimit, pra zgjodhën shpresën. Familja Jashari përshpejtojë kohën, përmbushi shekujt, ndërroje epokën dhe mbeti përjetësisht në kujtesën e kombit si rast unik për liri e unitet. Jam i bindur se historia nuk do të përsëritet përderisa jemi unik dhe nuk kemi frikë të shohim të sotmen dhe të nesërmen në sy”, theksoi Haradinaj. /tesheshi.com/
