Ambasadori italian në Tiranë Fabrizio Bucci, reagoi në lidhje me zhurmën e krijuar së fundi në ambientin politik shqiptar lidhur me disa përgjime nga dosja në gjykim e Ndragheta-s.
Aty, jo në mënyrë të qartë, përmenden zyrtarë shqiptarë pa emër, veç atij të këshilltarit të presidentit Meta, Ilir Kulla, duke u aluduar për implikime në afera.
Më aktive ka qenë opozita, ndërkohë që nga mazhoranca është kërkuar që të ketë hetime dhe të zbardhet nëse ka implikime.
Por për njeriun e Romës në Tiranë, duhet të jenë organet gjyqësore e jo politike ajo që të nxjerrë të vërtetat e përgjimeve.
“Italia është e do të jetë gjithmonë, përkrah institucioneve të Republikës së Shqipërisë në luftën ndaj korrupsionit dhe krimit të organizuar.
Mbështetje maksimale autoritetit gjyqësor shqiptar për shqyrtimin e plotë të çdo episodi të korrupsionit apo të paligjshmërisë, nga cilido qoftë kryer dhe prej ngado rrjedh.
Le t’i lemë gjyqtarët të kryejnë në paqe punën e tyre, me qetësi e në mënyrë të pavarur. U përket atyre të dallojnë faktet nga fjalët. Polemikat e padobishme e të instrumentalizuara asnjëherë nuk ndihmojnë në verifikimin e së vërtetës.
Të gjithë duhet të angazhohen në luftën ndaj krimit dhe korrupsionit përmes sjelljeve të duhura. Kush do ta bëjë këtë do të ketë përherë mbështetjen e Italisë”, shkruan Bucci. /tesheshi.com/
