Një gazetar ukrainas përdori vizitën e ministrit të Jashtëm rus Sergei Lavrov në Ankara për ta përballur atë me çështjen e eksporteve të grurit nga Ukraina.
Kujtojmë, Lavrov dje ishte në Turqi për bisedime për krijimin e korridoreve të sigurta për eksportet e grurit ukrainas.
Konferenca për shtyp e Lavrov dhe homologut të tij turk, Mevlut Çavushoglu, po përfundonte dhe gazetari Muslim Umerov nuk mundi të bënte një pyetje pavarësisht përpjekjeve të përsëritura.
Ndaj, ai u ngrit dhe iu drejtua drejtpërdrejt Lavrovit:
“Unë jam nga televizioni publik ukrainas dhe dua të bëj një pyetje!” tha ai. “Përveç drithërave, çfarë mallrash keni vjedhur nga Ukraina dhe kujt ia keni shitur?”
Përgjigja e Lavrovit:
“Ju ukrainasit jeni gjithmonë të shqetësuar për atë që mund të vidhni dhe mendoni se të gjithë mendojnë kështu. Synimet tona atje janë të qarta, ne duam t’i shpëtojmë njerëzit nga presioni i regjimit neo-nazist. Ne nuk ndërhyjmë në shpërndarjen e grurit. Që drithi të largohet nga portet, zoti Zelensky duhet të japë një urdhër, kaq”, u përgjigj Lavrov.
Umerov më vonë tha për mediat se gjatë gjithë konferencës për shtyp e mbajti dorën në ajër për të bërë një pyetje, por e kuptoi se organizatorët “nuk e lanë të fliste”, ndaj vendosi të ndërhyjë.
“Kam marrë rrezikun të ndërpres konferencën për shtyp sepse e gjithë Ukraina është duke pritur për një përgjigje për këtë pyetje”, tha ai. /tesheshi.com/
