Një i ri, me gjasë delikuent e islamofob, përgjaku një xhami të vogël në Francë, në qytetin e vogël La Grand-Combe, duke qëlluar me thikë e vrarë një besimtar aty teksa po falej. Vrasësi është ende në arrati, ndërsa policia është duke e kërkuar në mënyrë aktive, raporton Le Parisien.
Konkretisht, i dyshuari Olivier H. është shtetas francez me origjinë boshnjake nga një familje e krishterë me njëmbëdhjetë fëmijë.
Ai është në të njëzetat, merr ndihmë sociale (RSA) dhe, sipas burimeve pranë hetimit, e kalon pjesën më të madhe të kohës duke luajtur videolojëra. Familja e tij jeton në banesa sociale në La Grand-Combe, raporton France 24.
Olivier H., i lindur në vitin 2004 në Lyon, nuk kishte precedentë penalë dhe nuk ishte i njohur për shërbimet lokale të sigurisë. Sipas prokurorit të rastit ai nuk e njihte viktimën e tij.
“Një akt i rastësishëm me një sfond të mundshëm racist ose islamofobik është një nga hipotezat që po hetojmë”, tha prokurori. Ai theksoi gjithashtu se profili psikologjik dhe psikiatrik i sulmuesit po merret në konsideratë hetimi.
Hetuesit aktualisht nuk kanë asnjë informacion mbi vendndodhjen e të dyshuarit. Ai vinte herë pas here në qytet, ku jetonte një pjesë e familjes së tij. Vëllai i tij më i vogël, një i mitur, u mor në paraburgim për t’u marrë në pyetje të shtunën në një përpjekje për të marrë informacione shtesë, por u lirua më vonë pa u ngritur akuza. Sipas burimeve nga hetimi, babai i të dyshuarit është i njohur për policinë për krime të lehta.
Gjatë sulmit të së premtes, Olivier H. e filmoi viktimën me celular ndërsa ai po vdiste, sipas një burimi pranë hetimit.
Viktima e sulmit ishte një i ri me origjinë nga Mali, i moshës 23 deri në 24 vjeç. Ai punonte rregullisht si vullnetar në xhami, ku pastronte ambientet çdo të premte para namazit të xhumasë. Ai ishte vetëm në xhami në kohën e sulmit.
Pamjet e kamerave të sigurisë tregojnë Olivier H. dhe viktimën që takohen dhe bisedojnë, dhe më pas hyjnë së bashku në xhami.
“Viktima fillon të lutet, sulmuesi e imiton atë dhe pastaj papritmas nxjerr një thikë dhe e qëllon disa herë me thikë”, përshkroi prokurori. /tesheshi.com/
