Nga Mensur Krasniqi
Asnjë vendim konkret nga mbledhja maratonike e Kryesisë Qendrore të Bashkimit Demokratik për Integrim, e cila mbaroi thuajse në mesnatë. Pas mbarimit të takimit, ku u diskutua lidhur me vendimin përfundimtar nëse do të vazhdojnë me parimin “fituesi me fituesin” dhe të bëjnë koalicion me VMRO-DPMNE-në e Nikolla Gruevskit, para mediave foli kreu i BDI-së, Ali Ahmeti dhe zëdhënësi i saj, Bujar Osmani.
Ali Ahmeti, para gazetarëve tha se nuk një ka ende një përgjigje, por se po bëhen analiza për një vendim sa më të mirë për shqiptarët dhe komunitetet tjera në përgjithësi.
“Nuk ka përgjigje me kë shkohet në koalicion. Analizohen të gjitha opsionet për vendim sa më të mirë në dobi të shqiptarëve dhe gjithë qytetarëve në Republikën e Maqedonisë, për popullin shqiptar, maqedonas, serb, vlleh, dhe janë duke u diskutuar të gjitha opsionet”, deklaroi Ahmeti.
Ahmeti u pyet edhe mbi arsyet e takimit të nënkryetarit të BDI-së, Nevzat Bejta, me liderin e LSDM-së, Zoran Zaev, takim ky që ndodhi ndërsa Kryesia Qendrore e BDI-së po diskutonin për një qeveri me VMRO-në.
“Unë jam kryetar i BDI-së dhe di çdokënd në çdo vend ku është se me çfarë detyra e çoj”, tha Ahmeti.
Nga ana tjetër, zëdhënësi i BDI-së, Bujar Osmani ka bërë të ditur se debati i Kryesisë Qendrore do të vazhdojë edhe gjatë ditës së nesërme, me ç‘rast do të sillet ndonjë vendim.
“Kemi vendosur që nesër të vazhdojmë përsëri me të njejtin format. Thjesht nuk janë shterur të gjitha argumentet të cilat anëtarët e kryesisë i kanë për të gjitha opsionet. Janë gjithë anëtarët e kryesisë, janë edhe deputetët dhe thjesht debati nuk është ende i shterur për të marrë vendime konkrete, ashtu që kemi lërë hapësirë që nesër të vazhdojmë debatin”, deklaroi Osmani.
Ai tha se po bisedojnë si me VMRO-në poashtu edhe me LSDM-në, ndërsa gjuha shqipe mbetet kushti kryesor pa të cilin nuk mund të arrihet asnjë marrëveshje me cilën do nga partitë maqedonase.
“Ne bisedojmë me të gjitha partitë politike dhe presim reagimin e tyre. Unë dhash një prononcim se gjitha argumentet fokusohen në platformën e BDI-së sesa në atë se me cilin opsion ne do zgjedhim. Gjuha shqipe është kusht pa të cilin nuk mundet të formojmë qeveri. Po ashtu edhe argumentet tjera të BDI-së mbeten si kushte, presim qëndrimin e partive politike maqedonase”, tha Osmani. Ai gjithashtu shtoi se ka dallime në qëndrime mes funksionarëve të BDI-së, por nuk ka mosmarrëveshje dhe mbizotëron një debat konstruktiv.
Kujtojmë se sot, kalon afati i VMRO-DPMNE-së si parti fituese nga blloku politik maqedonas për të formuar qeverinë. Në rast se edhe sot pas 20 ditësh nga marrja e mandatit, kreu i VMRO-së, Nikolla Gruevski nuk arrin të formon qeverinë, atëherë sipas Kushtetutës, presidenti i shtetit, Ivanov është i detyruar që mandatin t’ia dorëzojë partisë së dytë fituese të zgjedhjeve, LSDM-së. /tesheshi.com/
