Nga 1 janari i 2018-ës të gjitha bizneset do të përfshihen në skemën e TVSH, të paktën sipas projektit të qeverisë, që kundërshtohet nga opozita. Debati më i madh është përfshirja në këtë skemë e biznesit të vogël, që do të detyrohet të lëshojë fatura me TVSH. Opozita pretendon se kjo skemë do të rëndojë së pari në xhepat e qytetarëve, pasi çmimet do të rriten, ndërsa së dyti vetë bizneset e vogla nuk do të mund të përballojnë kostot dhe do të mbyllen.
Skema synon që për çdo blerje që biznesi i vogël bën te furnizuesit krahas faturës tatimore duhet të regjistrojë edhe TVSH-në. Ndërsa për shitjet që bën biznesi i vogël, duhet të llogarisë TVSH-në te konsumatori.
Nga skema e TVSH, të paktën sipas deklarimeve, përjashtohen zejtarët, tezgat e fruta–perimeve dhe tregjet e standardizuara të bashkive.
Në anën tjetër, qeveria ka deklaruar se taksat e tjera për biznesin e vogël do të vazhdojnë të mos ndryshojnë, pra nuk do të paguhet tatami i thjeshtuar dhe taksa e biznesit të vogël.
Bizneset me xhiro nga 5 milionë deri në 8 milionë lekë do të paguajnë 5 për qind tatimfitim, ndërsa bizneset me xhiro mbi 8 milionë lekë do të paguajnë 15 për qind tatimfitim.
Ministri i Ekonomisë dhe Financave, Arben Ahmetaj, ka deklaruar se TVSH do të deklarohet 1 herë në 3 muaj dhe nuk ka kosto për biznesin.
“Biznesi i vogël është në raport të padrejtë me biznesin e madh, sepse biznesi i madh ia ngarkon 20 përqindëshin si konsumator i fundit, ndërsa tani do të ketë mundësinë të kreditohet, që do të thotë të rimbursohet për shpenzimet që bën në raport me shitjen. Nuk ka rritje çmimesh, çmimet i dikton tregu dhe TVSH-ja është e fshehur apo e deklaruar te çmimi final. Nuk do të ketë rritje të taksës për biznesin e vogël. Sot biznesi i vogël deklaron sigurime shoqërore 1 herë në 3 muaj.
Edhe TVSH-në do ta deklarojë 1 herë në 3 muaj, në mënyrë të thjeshtuar siç deklaron sigurimet shoqërore, pra kostoja do të jetë zero”, ka deklaruar Ahmetaj. /tesheshi.com/
