Në një fabrikë këpucësh në Manila ka rënë zjarr ditën e sotme dhe si pasojë 72 persona kanë ndërruar jetë. Bilanci tragjik i viktimave është bërë i ditur nga kryebashkiaku i distriktit Venezuelian, Rex Gatchalian. Autoritetet janë shprehur se nuk janë ende në gjendje për të thënë nëse ka apo jo humbje të tjera jetësh. Për të bërë një bilanc paraprak dhe për të shuar flakët e zjarrit janë dashur rreth 5 orë
Dyshohet se zjarri ka nisur si pasojë e jnë problemi elektrik të ndodhur në një nga zonat e saldimit, çka ka shkaktuar shpërthim në substancat kimike të përdorura për prodhimin e plastikës.
Punonjësit e paktë që kanë mundur të shpëtojnë kanë treguar se vetëm operatorët e katit nëntokësor kanë dalë në kohë nga ndërtesa, ndërsa ata në katet e mësipërme u zunë ‘në grackë’.
Disa familjarë kanë treguar se kanë marrë mesazhe telefonike nga personat e bllokuar në brendësi të stabilimentit, ndërsa ndërtesa u përfshi nga flakët. Në fabrikë janë të punësuar rreth 200 punonjës, por jo të gjithë ishin në punë në atë moment.
Zjarrëfikësit kanë luftuar për orë të tëra me flakët dhe nxehtësinë ekstreme, të favorizuar nga materialet dhe kimikatet që ndodheshin në brendësi të fabrikës. Këto kimikate janë bërë shkak që ndërtesa edhe pas rreth 5 orësh të jetë ende e rrezikshme dhe të mos ketë dalë një bilanc përfundimtar i viktimave.
“Jemi duke hetuar për të kuptuar se çfarë ka ndodhur saktësisht dhe me siguri që do të ketë pasoja gjyqësore ndaj drejtuesve të fabrikës”,- ka thënë Leonardo Espina, shefi i policisë.
Punonjësit e fabrikës, sipas të dhënave të disa nga të mbijetuarve, nuk kishin asnjë lloj mbrojtje të veçantë kundër substancave toksike dhe as nuk kishin marrë ndonjë udhëzim si të vepronin në rast zjarri. Pagesa ditore e tyre në fabrikë është rreth 6 euro. /tesheshi.com/
