Holanda pësoi të shtunën një humbje turpëruese në Sofje, e bashkë me të e bërë akoma më të ndërlikuar rrugëtimin drejt botërorit të radhës, atij të vitit 2018.
Po kjo Holandë nuk ia doli të shkonte vitin e shkuar në Francë, aty ku luhej kampionati europian. Dështim i plotë i një ekipi të lëvduar aq shumë për vite me radhë.
Humbja 2-0 ndaj bullgarëve i ka zbritur holandezët në vend të katërt në grupin A të kualifikueseve europiane të Botërorit 2018.
Çmimin për paraqitjen e keqe e ka paguar trajneri Danny Blind, i shkarkuar të dielën nga federata e vendit të tij. Me detyrën të marrë dy vite të shkuara, Blind detyrohet ta lërë atë pa asnjë sukses.
Shkarkimi ka për argument rezultatet e dobëta, edhe pse Blind ka deklaruar se skuadra ishte në rrugën e duhur, edhe pse e ka quajtur incident humbjen ndaj Bullgarisë.
Fred Grim, ndihmësi i tij, do të ulet përkohësisht në vendin e lënë bosh. Ai do ta drejtojë Holandën të martën, kur të ndeshet me Italinë në Amsterdam në një takim miqësor. /tesheshi.com/
