Rezultatet e zgjedhjeve të fundit në Mbretërinë e Bashkuar kanë sjellë një lajm të mirë për muslimanët në vend, pasi këta të fundit kanë arritur sukses historik duke rritur numrin e vendeve të fituara. Tashmë, deputetët muslimanë kanë 18 vende në Parlament, ose tre më shumë se zgjedhjet e 2017-ës.
70 muslimanë morën pjesë në garën zgjedhore, një numër dukshëm më i lartë se 44 sosh në zgjedhjet e vitit 2017.
Pritej që muslimanët të mund të fitonin 22 vende, por humbja e madhe e pësuar nga Partia Laburiste pengoi një rezultat të tillë.
Laburistët bënë një rekomandim që 33 përfaqësues muslimanë të garojnë në zgjedhje.
Partia Konservatore, nga ana tjetër, rriti numrin e kandidatëve të saj muslimanë në 22, dhe, për dallim nga Laburistët, vendet që konsideroheshin pothuajse të vendosura në favor të Konservatorebve, nuk i kalonin 5.
Kur bëhet fjalë për Partinë Liberale Demokratike, e cila kurrë më parë nuk ka paraqitur asnjë kandidat musliman, gjatë zgjedhjeve të fundit ajo dha miratimin për 17 muslimanë për të kandiduar, por për shkak të rezultateve të dobëta në nivel partie, nuk mundi që asnjë prej tyre të hyjë në Parlament.
Partia e Laburiste do të përfaqësohet në Parlament nga 14 ligjvënës muslimanë, duke përfshirë tre anëtarë të rinj, ndërsa katër vende do t’u takojnë muslimanëve nga Partia Konservatore.
Sipas listës së rajoneve ku kanë fituar kandidatët muslimanë, mund të theksohet se ata janë të përqëndruar kryesisht në Londër dhe Birmingham, ky i fundit i njohur për popullsinë e madhe muslimane.
Kamel Hawwash, një profesor në Universitetin e Birminghamit, e përshkruan rritjen e përfaqësimit të muslimanëve si “pozitiv dhe inkurajues”.
Sipas tij, një rezultat i tillë flet për hapjen e partive britanike për “përfaqësim më të madh të pakicave, përfshirë atë muslimane”.
Ai mendon dhe thotë se “votuesi britanik rrëzoi pengesën psikologjike për t’u përfaqësuar nga një deputet musliman”.
Hawwash, një anëtar i Partisë Laburiste, vuri në dukje se rritja e numrit të deputetëve muslimanë përfundimisht do të çojë në një rritje të numrit të votave që mbrojnë çështjet muslimane. /tesheshi.com/
