Kancelari austriak Karl Nehammer tha në një njoftim për një intervistë për NBC se “Vladimir Putin beson se ai po e fiton luftën”. Intervista e plotë do të transmetohet nesër në SHBA.
Nehammer u takua me presidentin rus në fillim të kësaj jave dhe kështu u bë lideri i parë perëndimor që e bën këtë që nga fillimi i pushtimit në shkurt.
Ai thotë se i tha Putinit në Moskë se “po e humbiste moralisht luftën” dhe se “të gjithë ata që janë përgjegjës për krimet e luftës duhet të sillen para drejtësisë”.
Në pjesë nga intervista e Nehammer me NBC, kancelari austriak tha se besonte se Putini jetonte në botën e tij.
“Unë mendoj se ai është në botën e tij të luftës tani. Ai mendon se lufta është e nevojshme për garancitë e sigurisë për Federatën Ruse. Ai nuk i beson komunitetit ndërkombëtar. Ai fajëson ukrainasit për gjenocidet në Donbas. Pra, ndërsa ai është në botën e tij, unë mendoj se ai e di se çfarë po ndodh në Ukrainë. Por unë mendoj se ai beson se po e fiton luftën,” tha Nehammer.
Intervistuesi e pyeti Nehammerin për reagimin e Putinit ndaj akuzave për krime lufte.
“Më tha se do të bashkëpunonte me hetimin ndërkombëtar nga njëra anë dhe nga ana tjetër më tha se nuk i besonte botës perëndimore. Kështu që do të jetë problem në të ardhmen. Mendoj se besimi ndërkombëtar në Kombet e Bashkuara, gjithashtu një hetim ndërkombëtar, është i nevojshëm. Pra, ishte një diskutim i vështirë me njëri-tjetrin.
Por unë u përpoqa ta bind atë se, për shembull, lufta në ish-Jugosllavi na tregoi se një hetim ndërkombëtar është i dobishëm për ndjekjen penale të kriminelëve të luftës”, tha kancelari austriak për NBC. /tesheshi.com/
