Vendet e Quint-it, Franca, Gjermania, Italia, Mbretëria e Bashkuar dhe Shtetet e Bashkuara, përcollën një deklaratë të fortë në prag të zgjedhjeve në Kosovë, pikërisht kushtuar atyre. Ata thanë se nga këto zgjedhje presin shumë nga elita politike e Prishtinës.
“Siç edhe vunë në dukje qeveritë tona së fundmi, zgjedhjet dhe formimi i qeverisë së re ofrojnë një mundësi për rifillimin urgjent të bisedimeve me Serbinë me qëllim të arritjes së një marrëveshjeje gjithëpërfshirëse, politikisht të qëndrueshme, dhe ligjërisht të obligueshme, dhe që i kontribuon stabilitetit rajonal. Kjo qartësisht është në interesin e Kosovës. Për të arritur një marrëveshje qeveria e ardhshme e Kosovës do të ketë nevojë për fleksibilitet për të negociuar, dhe aftësi për të artikuluar një vizion pozitiv për marrëdhënien e ardhshme të shtetit me Serbinë, dhe dobitë ekonomike dhe të sigurisë që ajo mund t’i sjellë Kosovës”, thuhet në deklaratë.
Por mbi të gjitha, mesazhi i tyre i drejtohet votuesit kosovar.
“Ne inkurajojmë qytetarët që të lajmërojnë abuzimet e fondeve apo resurseve publike në fushatë, si dhe çdo përpjekje për frikësim. Ne presim nga autoritetet e Kosovës që të ndërmarrin veprime të shpejta dhe të duhura ndaj gjitha shkeljeve në tërë shtetin. Për të ardhmen demokratike të Kosovës është me rëndësi që të gjithë ata që janë të përfshirë të respektojnë ligjet zgjedhore të shtetit, dhe që zgjedhjet të zhvillohen siç është e paraparë me 6 tetor”, thotë deklarata e ambasadave të vendeve të Quint-it.
Aty theksohet gjithashtu, se kandidatët nuk duhet të kenë të kaluar kriminale.
” Votuesit dëshirojnë që udhëheqësit e tyre të sigurojnë që të rinjtë e Kosovës do të mund të ndërtojnë të ardhmet e tyre këtu. Votuesit meritojnë përgjigje të detajuara nga partitë për atë se si programet e tyre do të forcojnë sistemin e arsimit ashtu që të diplomuarit të jenë më mirë të përgatitur për punësim; se si ato programe do të krijojnë vende pune dhe si do të përmirësojnë zhvillimin e sektorit privat dhe investimet, si do të përkrahin ndërmarrësinë, si do të mbajnë përgjegjësinë fiskale, dhe si do të përmirësojnë sigurinë e furnizimit me energji dhe mjedisin. Ç’është më e rëndësishmja, Kosova ka nevojë për sundim të ligjit. Besojmë se kandidatët duhet të mos kenë të kaluar kriminale, apo lidhje me veprimtari kriminale, dhe se duhet të tregojnë se si ata do të luftojnë korrupsionin dhe krimin e organizuar, si do të kundërshtojnë pandëshkueshmërinë dhe nepotizmin në nivelet më të larta, dhe si do të bëjnë qeverisje të pastër përmes emërimeve të bazuara në meritë dhe politikat dhe programet që shpërblejnë integritetin. Mundësia e parë që partitë të shfaqibn këto përkushtime është duke përpiluar lista të kandidatëve që kanë për prioritet kompetencën, jo lidhjet”, thekson deklarata. /tesheshi.com/
