Në luftë për mbijetesë, Granada fitoi mbrëmjen e së premtes 4-1 ndaj Real Betisit, në ndeshjen hapëse të javës së 23-të të kampionatit spanjoll.
Veç fitores, veç trepikëshit aq të rëndësishëm, kjo ndeshje u veçua dhe për diçka tjetër. Granada doli në fushë me 11 lojtarë me kombësi të ndryshme.
Ndodh për herë të parë kjo në La Liga, në një kampionat ku është njohur dhe ekstremi tjetër më herët, me Atletik Bilbaon që aktivizonte vetëm lojtarë baskë.
“Granada bën historinë,” është titulli i Marca-s. “Për herë të parë në historinë e kampionatit, një ekip e nisi lojën me 11 lojtarë të kombësive të ndryshme.”
Po kush qenë lojtarët e formacionit të Granadës që e nisën mbrëmë ndeshjen ndaj Betisit e që bënë historinë në kampionatin spanjoll?
Ochoa (meksikan), Ingason (islandez), Foulquier (francez), Gaston Silva (uruguajan), Litri (spanjoll), Agbo (nigerian), Hongla (kamerunas), Carcela (maroken), Wakaso (ganez), Andreas Pereira (brazilian), Adrian Ramos (kolumbian). /tesheshi.com/
