Nga Arsola Mulia
Familja është gjëja më shenjtë për çdo njeri. Por në ditët e sotme, dikush e mbron me jetë dhe dikush I merr jetën asaj. Rastet e fundit që kanë mbushur hapësirat e kronikave të zeza kanë sjellë një trysni të konsiderueshme në psikologjinë e opinionit publik.
Ngjarjet janë nga më të ndryshmet, por pasojat janë të njëjta: vrasje dhe jetë të humbura. Krimet e pasionit po ndihen egër me pasojat e tyre edhe në ditët e fundit. I dashuri vret vajzën pasi ajo vendos t’i japë fund lidhjes së tyre. Gra të dhunuara, burri që vret të shoqen për shkaqe xhelozie, një grua e cila nën kërcënimin e armës pranon të ketë pasur lidhje jashtëmartesore. Media i ka tashmë hapësirate kronikës së zezë të tejmbushura me të tilla lajme.
Por si ndikon kjo panoramë në psikologjinë e opinionit publik? Si janë të prirur njerëzit të veprojnë pasi kanë parë dhe dëgjuar rastet më të frikshme të krimeve brenda familjes? Për këtë flet psikologia Jeta Shkurti, e cila na sqaron këndvështrimin
Çfarë është krimi nga pasioni?
“Krimet nga pasioni” i referohen veprimeve kriminale në të cilën autori kryen një krim, veçanërisht vrasje, kundrejt dikujt për shkak të një impulsi të fortë që ndodh befas dhe jo me paramendim. Krim tipik pasioni është vrasja e bashkëshortit/es nga xhelozia, dyshimi për tradhëti. Personi që kryen “krim për pasion” i përgjigjet shqetësimit, ose situatave kërcënuese, duke marrë masa ekstreme sic është vrasja.
Çfarë i shtyn personat të kryejnë krime?
Njerëzit vrasin sepse kanë emocione, nuk janë robotë. Shkaqet janë të ndryshme duke filluar nga xhelozia, frika, zemërimi, çrregullimet e personalitetit, psikopatia, sociopatia, deri tek problemet sociale e ekonomike. Ne kurrë nuk do ta dimë saktësisht se cfarë e shtyn dikë të vrasë.
Për sa kohë njeriu ka dëshira dhe nevoja, si dhe mundësi për t`i realizuar ato, krimi ka gjasa të ekzistojë për shumë kohë. Përsa kohë që vendimet që marrin njerëzit bazohen si në emocione ashtu edhe arsye, herë mbizotëron njëri e herë tjetri. Në situatat kur veprohet për shkak të emocionit, njerëzit janë impulsivë dhe injorojnë arsyetimet. Këto të ashtuquaturit krime prej pasionit, mund të ndodhin mes njerëzve që kanë lidhje të fortë emocionale.
Si ndikojnë këto raste të pasqyruara në media, në psikologjinë e opinionit publik?
Është e pritshme që raste tragjike të pasqyruara në media të trondisin opinionin publik. Do ishte jonormale të ndodhte e kundërta. Personalisht kronikën e zezë do sugjeroja të mos përfshihej në cdo edicion informativ, por në një orar të caktuar dhe sigurisht në orë kur fëmijët flenë. Vrasjet e vepra të tjera brenda familjes mund të cënojnë ndjenjën e sigurisë dhe besimit mes njerëzve që kanë lidhje gjaku. Ndoshta mund të nxisin edhe përhapjen e tyre, për shkak të fenomenit të imitimit.
Këshilla juaj për familjen sot?
Përmirësimi I vetes, i njeriut përmes përmbushjes së kapaciteteve të veta në kahun pozitiv të tij, është një nga mënyrat për ta lënë krimin si pjesë e të kaluarës njerëzore. Por që të arrihet kjo, lipset vullnet multidimensional. Familja, shoqëria, shteti duhet të koordinohen në një linjë edukimi. /tesheshi.com/
