Parlamenti Evropian, në sesionin e sotëm të pasdites do të debatojë për Marrëveshjen e Stabilim – Asocimit, e cila në tetor të vitit të kaluar është arritur mes Bashkimit Evropian dhe Kosovës.
Nënkryetarja e Parlamentit Evropian, Ulrike Lunacek, i ka thënë Radio Kosovës se debati do të zhvillohet të mërkurën në sesionin e pasdites, ndërsa hedhja në votim e marrëveshjes do të bëhet të enjten.
Ajo para eurodeputetëve do të paraqesë rëndësinë e këtij dokumenti për Kosovën dhe bllokun 28 anëtarësh. Ulrike Lunaçek pret që Parlamenti Evropian të japë pëlqimin për marrëveshjen e Stabilizm – Asocimit.
Në fakt, fryma e këtij debati do të jetë ajo që do përcaktojë votimin e së enjtes, me 21 janar, kur Parlamenti Evropian mbyll në Strasburg sesionin parlamentar, që ka nisur të hënën me 18 janar.
Teksti i Marrëveshjes së Stabilizim – Asocimit është neutral ndaj statusit të Kosovës. Por, nënkryetarja e Parlamentit Evropian, Lunacek, ka paralajmëruar se në dokumentin e marrëveshjes Parlamenti nuk është neutral ndaj statusit dhe Kosova nuk do ta ketë fusnotën si shenjë. /tesheshi.com/
