Nga Blendi Gashi
Se PDK dhe LDK nuk e durojnë njëra-tjetrën edhe pse së bashku udhëheqin me vendin, ka treguar së fundmi edhe Raporti i Progresit i Komisionit Evropian, në të cilin thuhet se mungon komunikimi mes ministrave të partive në fjalë.
Posti i presidentit, të cilin e pretendon Hashim Thacci. pritet që ta vë në peshore fatin e të ashtuquajturit “koalicion i elefantëve”.
Ditëve të fundit janë shtuar zërat se “martesa e detyruar PDK-LDK”, do të prishet menjëherë në momentin që Hashim Thaçi të zgjidhet president i vendit dhe vendi do të shkojë në zgjedhje të reja.
Janë vetë deputet të LDK-së që kanë ngritur alarmin duke thënë se kjo do të ndodh pasi PDK-së më pas do t’i shtohen apetitet që të tentojë të marrë edhe postin e kryeministrit.
Ka qenë deputetja e LDK-së, Vjosa Osmani, e cila në deklarime të saj për media ka shprehur bindjen se PDK po luan lojë të fshehtë dhe se do ta tradhëtojë LDK-në e Mustafës.
“Sapo Thaçi të zgjidhet president, PDK sërish do ta çojë vendin në zgjedhje të reja, sepse PDK e do edhe postin e kryeministrit“, ka deklaruar Osmani.
Por, a mund të ndodh një skenar i tillë sipas analistëve…?
Njohësi i rrethanave politike në vend, Avdullah Bytyqi, e sheh të mundshëm realizimin e një skenari të tillë, pasi thotë se koalicioni PDK-LDK, që nga fillimi është nisur me hile dhe si i tillë do të përfundojë.
“Është herët të parashikohet kjo, por skenari duket tërësisht i mundshëm. Ka shumë mundësi pasi të rehatohet Thaçi president dhe të sigurojë një mandat, fundja deri në zgjedhje të reja, PDK-ja ta prishë koalcionin për t’i atribuar dështimet Mustafës me ministrant e LDK-së në mënyrë që në zgjedhje të reja të mos marrin shumicën e përgjegjësive”, ka deklaruar Bytyqi, për tesheshi.com.
Politologu Albinot Maloku, thotë se nëse PDK dhe Hashim Thaçi arrin të bëjë këtë lojë siç e mendojnë deputetët kundërshtues të LDK-së, atëher LDK është parti e pa denjë për të funksionuar në jetën politike e institucionale të vendit.
“Mirëpo, deri tani LDK është dëshmuar si parti e cila di ta ndërrojë kahun bash atëher kur thotë, ‘jo nuk e bëjmë’, e që PDK kurrë nuk ka treguar se ka pas vija të kuqe për partnerët e koalicionit”, ka deklaruar për tesheshi.com, Maloku.
Analisti politik, Islam Krasniqi, në një prononcim për tesheshi.com ka deklaruar se Thaçi është duke luajtur lojë të fshehtë që pasi të zgjedhet president synon ta çoj vendin në zgjedhje të reja.
“LDK-ja nuk do ta votoi ish kryeministrin Thaçin, sepse ka kuptuar dinakrinë e tij, i cili pasi të zgjedhet president do ta prish koalicionin dhe të dërgoj vendin në zgjedhje të jashtëzakonshme dhë të dalë sërish PDK-ja e para që të merr edhe drejtimin e qeverisë të cilën do ta udhëheq Kadri Veseli”, ka deklaruar Krasniqi. /tesheshi.com/
