Partia Demokratike ka akuzuar ministrin e Brendshëm Saimir Tahiri se ka lidhje me zyrtarë të kriminalizuar që njihen si pjesë e trafikimit të drogës.
Sekretari i Përgjithshëm i PD-së, Arben Ristani ka akuzar Tahirin për lidhje me Klemend Balilin, Drejtor i Transporteve në Sarandë, i cili sipas medias greke është cilësuar si “Eskobari i Ballkanit”.
“Opozita, e ka denoncuar që më 18 maj të 2014-s, kohë kur Rama e emëroi Klemend Balilin si drejtor të Transportit në qytetin e Sarandës. Balili është arrestuar në korrik të vitit 2006 me 750 kg kanabis.
Ai ka qenë sponsorizues i fushatës elektorale të PS-së në vitin 2013. E për këto lidhje të drejtpërdrejta, ai tha se rezultojnë të përfshirë kushërinjtë e ministrit Tahiri, Habilajt, nëpërmjet të cilëve ai ka pasur edhe lidhje me vet ministrin”, tha Ristani.
Nga ana e tij, Klement Balili që reagoi për mediat, tha se asnjë nga këto akuza nuk qëndrojnë.
“Unë kam një dëshmi të pastër penaliteti dhe këtë e verifikojnë të gjithë shumë qartë. Akuzohem se kam shkuar në Greqi e po bëja trafikun e drogës. Mediat thonë se jam arrestuar në Greqi, ndërkohë që unë jam në krye të detyrës. Unë kam që nga viti 2009 që nuk kam qenë në Greqi, e kjo vërtetohet shumë mirë edhe nga sistemi TIMS. E vërtetë se mendoja që akuzat politike bëheshin thjesht në kohë fushatash, por kjo fushatë shpifje dhe denigrimi me emra të përveçëm të zyrtarëve të PD-së, do të marrë përfundimisht një zgjidhje ligjore. Këdo që do të përbaltë emrin tim, do ta çoj për shpifje në gjykatë”, thekson Balili. /tesheshi.com/
