Oborri ish-SHQUP-it u mbush si asnjëherë që kur aty u instalua Partia Demokratike, në një tubim të organizuar nga kjo parti për të përkujtuar 26-vjetorin e themelimit. Fjalëmbajtësi kryesor, kryetari Basha tha se PD ka shumë se çfarë mund t’i ofrojë vendit, dhe mbi të gjitha sipas tij një model të ri politik.
“Ne mund t’i ofrojmë qytetarëve një model të ri politik, ku levat e fuqishme të kontrollit në demokraci të kenë hapësirën dhe mundësinë të kontrollojnë çdo vendim të qeverisë së ardhshme. Modeli i ri nuk duhet të mbështetet në fasadë dhe propagandë, por në punë dhe interesin publik”, theksoi kreu demokrat. Sipas tij, PD është ende një parti e madhe dhe të tillë e kanë mbajtur të madhe veprat e saj në dobi të shqiptarëve. Më tej, Basha u zhvendos në akuza ndaj qeverisjes aktuale:
“Shqipëria e vitit 1990 dhe kjo e vitit 2016 janë larg njëra-tjetrës, por kanë edhe të përbashkëta. 26 vite më parë ishte në fundin e një sistemi të kalbëzuar, me shqiptarët që iknin ku t’i çonte anija e fatit. Sot është në fund të qeverisjes së kalbëzuar, që ka korrupsionin dhe blerjen e votës në sistem. Ortakëria mes politikanëve dhe medias ka dobësuar mekanizmat e kontrollit ndaj qeverisë. Etja për pushtet me çdo kusht ka sjellë kriminelë në majat e pushtetit. Viktimat e kësaj politike janë njerëzit e thjeshtë”, u shpreh Basha.
Në fjalën e tij ai ka potencuar dhe faktin se kjo parti ka në panteonin e saj dy figura bazë, Azem Hajdarin dhe Sali Berishën. /tesheshi.com/
