Partia Demokratike ka denoncuar sot, atë që ajo e cilësoi si korrupsioni në Drejtorinë e Doganave, ku, siç tha deputetja Jorida Tabaku, nga shkurti i vitit 2014 deri në shkurtin e vitit 2015, në Dogana janë vjedhur 17 milion euro.
“Kompania koncesionare që është paguar me 8.2 mln euro për të sjellë në buxhetin e shtetit mbi 100 mln euro, dëshmon në raport Crown Agents, organizimin perfekt të korrupsionit në Drejtorinë e Doganave ku nga Shkurti 2014 deri në Shkurt 2015, raportohet se janë vjedhur 17 mln euro. Përballë këtyre argumenteve, qeveria jo vetëm që nuk ka reaguar, por paturpësisht i ka dekoruar me poste publike përgjegjësit, ata që kanë ngritur traun e doganës për miqtë dhe klientelën”,- tha deputetja Tabaku nga selia blu.
Ajo e cilësoi zbulimin e Crown Agents si majën e ajsbergut të korrupsionit dhe abuzimit në Drejtorinë e Doganave, e cila përgjatë këtij viti ka shënuar rekordin më negativ të mbledhjes së të ardhurave. Tabaku bëri me dije se vetë auditi i brendshëm i doganave është shprehur i shqetësuar për nivelin e lartë të mosrealizimit.
“Duke përforcuar edhe një herë faktin dhe të vërtetën që nuk ka zyrë përgënjeshtrimi apo transparence, që të mohojë raportin e Crown Agents që thotë se kontrabanda e cigareve dhe e naftës po gëlon në vend dhe është në ditët e saj të arta. Miliona euro që vidhen çdo ditë, janë investime të mohuara, rrugë të mohuara, janë shkolla të mohuara, rritje të mohuara të pagave e pensioneve”,- deklaroi ndër të tjera Jorida Tabaku./tesheshi.com/.
