Partia Demokratike ka paditur ditën e sotme në gjykatë Bashkinë e Tiranës, duke e akuzuar se nuk jep informacion mbi masterplanin e ndërtimeve që do të bëhen në parkun e liqenit artificial.
“Edhe pse në emër të këshilltarëve kemi dërguar dhjetëra kërkesa me shkrim Bashkisë Tiranë, duke filluar që nga data 20 tetor, për fat të keq edhe sot që flasim, Bashkia Tiranë, z.Veliaj, në flagrancë të plotë, shkel ligjin duke mos dhënë asnjë informacion”, – tha kreu i Këshilltarëve të PD-së, Leonard Olli.
Ai sqaroi se ligji për vetëqeverisjen vendore, saktëson në mënyrë eksplicite, se këshilltari me kërkesën e tij informohet për gjithçka dhe në çdo kohë nga kryetari i Bashkisë. Sipas Ollit, kjo mungesë transparencë ka vijuar në të gjitha mbledhjet e Këshillit Bashkiak.
“Ky është teatri absurd që ka krijuar në këtë moment Veliaj në funksionimin e Këshillit Bashkiak. Bunkerizim total i Bashkisë, terr i plotë informativ dhe për më tepër në mungesë të respektimit të ligjit që nuk është në varësinë apo dëshirën e z.Veliaj”, – përfundoi Leonard Olli. /tesheshi.com/
