Demokratët e kanë përjetuar si diçka anti-kushtetuese paktin e lidhur mes Kryeprokurores Marku e ministrit të Rendit Xhafaj. Nje treshe juridike e selisë blu, Bylykbashi-Alibeaj-Bardhi, thanë se “sot është lidhur një marrëveshje mes Edi Ramës dhe Prokurorisë”.
“Marrëveshja i shërben shmangjes së përgjegjësisë penale të zyrtarëve të korruptuar dhe mbi të gjithë grupave të rrezikshme kriminale, pasi në gjykatë nisja e hetimeve sipas kësaj marrëveshjeje quhet nul”, u shpreh Gazmend Bardhi, ish-ministër Drejtësie pas paktit Rama-Basha.
Të tillë e konsideroi edhe LSI: “Mjafton të lexosh vetëm objektin e marrëveshjes të cituar me lart, dhe do te gjesh menjëherë kundershtinë e saj me Kushtetutën. Sepse krimi i korrupsionit në bazë të Kushtetutës dhe paketës së ligjeve të reformës në drejtësi është objekt i veprimtarisë së Prokurorisë së Posaçme dhe Njësisë së Posaçme Hetimore, të cilat sipas nenit 148, pika 4 të Kushtetutës janë të pavarur nga Prokurori i Pergjithshëm! Pra, ç’punë ka Prokurori i Përgjithshëm, dhe aq me pak Ministri i Brendshëm me luftën kundër korrupsionit, që është objekt i veprimtarisë së Prokurorisë së Posaçme?!”, u shpreh Luan Rama. /tesheshi.com/
