Një vit pasi ka dorëzuar detyrën si kryetar bashkie në Leskovik, ndiqet penalisht për veprën penale të “Shpërdorimit të detyrës”. Bëhet fjalë për ish-kryetarin e bashkisë, Fatmir Guda 43 vjeç, i cili gjatë mandatit të tij përfaqësonte Partinë Demokratike.
Policia e qarkut të Korçës njofton se: “Specialistët e Seksionit për Krimin Ekonomik-Financiar, në Drejtorinë Vendore të Policisë Korçë filluan procedimin penal në gjendje të lire, ndaj shtetasit: Fatmit Guda, 43 vjeç, banues në Leskovik, për veprën penale: “Shpërdorim detyre”.
Sipas bluve të qarkut juglindor, proçedimi ndaj tij filloi pasi, ky Guda gjatë kohës kur ushtronte detyrën e kryebashkiakut të Leskovikut, dyshohet të ketë shitur toka (truall) në pronësi të qytetit, duke vepruar kështu në kundërshtim me ligjin. Kjo bashki ishte pjesë e rrethit të Kolonjës, ndërsa Guda në media apelonte shpesh herë për mungesë fondesh, me qëllim “investimin” e tyre në njësinë që administronte.
Pak kohë më parë, të njëjtin fat pati edhe ish-kryebashkiaku i Krujës, Shkëlzen Hoxha, bashkë me dy ish-vartësit e tij. Shkak u bë zbulimi i një rasti abuzimi me fondet e ministrisë së Punëve të Brendshme, për një investim në zonë.
Materialet i kaluan Prokurorisë të Rrethit Gjyqësor Korçë, për veprën penale: “Shpërdorim detyre” parashikuar nga Kodi Penal./tesheshi.com
