Kryeministri Rama ka rrëzuar fjalët e përhapura se tezat e provimit të maturës kanë nisur të shiten në këmbim të votave.
Nga Poliçani, shefi i mazhorancës “vuri dorën në zjarr” që kjo nuk mund të ndodhë.
“Dua t’u them të gjithë maturantëve dhe prindërve që kushdo që ju ofron këtë është në mashtrim sepse tezat e Maturës Shtetërore janë të supersekretuara dhe askush nuk mund t’i ketë, jo më t’i nxjerrë në pazarin e votave. Mjafton një ofertë e tillë që shkel dinjitetin e prindërve tuaj për të refuzuar ofertuesin dhe për t’i dhënë fund një herë e përgjithmonë iluzionit se shkollat mund të merren me kopje, se votat mund të merren me kopje, se Shqipëria mund të mbahet peng me kopje”, tha Rama.
Po ashtu, në fjalimin e tij kreu i qeverisë i mëshoi fort “grarisë së munguar” në listat e PD-së, në funksion të thithjes së sa më shumë vote femërore, pa dallim moshe e bindjeje politike.
“Duhet të bashkohen të gjitha gratë, vajzat, nënat, motrat dhe gjyshet, pavarësisht bindjeve politike, sepse bindjet e majta dhe të djathta janë nën bindjen se gratë duhet të jenë të respektuara njësoj si burrat”, theksoi Rama. /tesheshi.com/
