Portugezi Paulo Sousa e mori drejtimin e skuadrës së Firences në verën e 2015-ës, dhe në fazën e parë të kampionatit italian Fiorentina bëri një figurë mjaft të mirë, me një seri rezultatesh pozitive.
Rënia e formës është bërë e dukshme në javët e fundit, teksa violët nuk fitojnë prej 21 shkurtit, kur mundën 2-3 Atalantën në transfertë.
Fiorentina gjendet në vend të katërt në renditjen e Serisë A, por nga pas ka Interin që e rrezikon seriozisht. Përndryshe, vendi i tretë duket krejt i pamundur, me Romën e shkëputur shtatë pikë përpara.
Rezultatet e dobëta kanë bërë që të flitet për largimin e protugezit në fund të sezonit nga stoli i Fiorentinës.
Dy janë destinacionet e tij të mundshme, siç lajmërojnë mediat sportive italiane, Zeniti në Rusi ose Milani. Raportohet se Paulo Sousa mund të jetë zgjedhje e parë te Milani nëse Mihajlovic shkarkohet si trajner në fund të kampionatit. /tesheshi.com/
