Ish-numri 2 i PD-së, sot kreu i Bindjes Demokratike, Astrit Patozi, është treguar tejet i ashpër me ish-eprorin e tij politik Lulzim Basha.
Duke reaguar ndaj këtij të fundit në lidhe me entuziazmin e treguar për vendimin e Gjykatës së Durrësit, ku regjistrimi i kandidates së Bindjes për garën e 30 Qershorit konsiderohej si jashtë afateve ligjore, e për pasojë fituesja e PS-së nuk merr dot mandatin për drejtimin e Bashkisë, Patozi vë në dyshim si formimin juridik të Bashës e si moralin e tij.
“Eh, mor jurist, që nuk e tregon diplomën, megjithëse ta kanë bërë çështje prej shumë kohësh shkollimin tënd në Holandë!
Qenke gëzuar për një vendim gjykate në Durrës, ndërkohë që po të kishe formimim elementar për atë, që pretendon se je arsimuar, duhet t’i njohësh të gjitha vendimet e institucioneve, jo vetëm ato që të pëlqejnë ty.
Ka një anekdotë me qershitë, për dikë që i ndante në të bëra pis ose jo. Dhe në fund i hëngri të gjitha, ngaqë i dukeshin të pastra edhe ato që kishin ngelur të fundit.
Sepse ka dhjetëra vendime të tjera gjykatash të cilat ti nuk i pranon, se nuk të interesojnë.
Por unë ta njoh hallin dhe nuk të vë shumë faj. Ti thjesht po shtyn ditët e tua, derisa të dalë një gjë tjetër e të harrohet fakti që i fale kundërshtarit 61 bashkitë pa betejë, kur u the njerëzve që zgjedhje vendore pa ty në Shqipëri nuk do të ketë.
E nise këtë punë me gënjeshtrën që BINDJA DEMOKRATIKE mori pjesë në procesin e 30 qershorit për të legjitimuar fitoren e Edi Ramës. Tani e paske ndërruar pllakën e gramafonit dhe po thua që ne ishim në këto zgjedhje për të deligjitimuar procesin.
Ka një shprehje të Shqipërisë së Mesme, që të shkon shumë në këtë rast: “O fol e mba, o dh.. e ha”.
Kaq për sot…Sepse unë nuk kam ndërmend të komentoj një vendim gjykate, sado i çmendur apo i porositur nga ndonjë kamikaz i dëshpëruar si ty që të më duket” shkruan Patozi.
Sipas Bashës, vendimi provon farsën edhe ligjore të 30 Qershorit. /tesheshi.com/
