Nga Blendi Gashi
Si edhe çdo vit tjetër edhe më 2018-tën, politikanët kosovarë kanë deklaruar në Agjencinë Kundërkorrupsion se podesojnë pasuri marramendëse, ku përfshihen, shtëpi, tokë, banesa, vetura të shtrenjta, para të ruajtura në banka, e gjëra tjera me vlerë.
Në këtë shkrim do merremi vetëm me pasurinë që posedon kabineti qeveritar “Haradinaj”, pra zv.kryeministrat dhe ministrat, konkretisht sa para kanë të ruajtura në banka, ç’vetura vozitin dhe sa kredi kanë për të shlyer.
Nga deklarimet del se shumica prej tyre kanë mijëra euro të kursyera edhe pse marrin paga mujore diç më shumë se 1 mijë euro, ndërsa nuk ju mungojnë as veturat e shtrenjta, kurse disa prej tyre kanë edhe kredi në shuma të mëdha.
Zv.kryeministri Fatmir Limaj, njëherit kryetar i NISMA-s Socialdemokrate ka për ta shlyer një kredi prej 40 mijë eurosh, ndërsa nuk ka deklaruar të ketë para të ruajtura në banka e as veturë në pronësi.
Zv. kryeministri Enver Hoxhaj ka të deponuara në bankë hiç më pak se 84 mijë euro, posedon veturë Audi A6 në vlerë 10 mijë euro, ndërsa nuk ka kredi për të shlyer.
Zv.kryeministri Dalibor Jevtiç, ka deklaruar 40 mijë euro para të gatshme në një bankë në Smederevë të Serbisë, një veturë në emër personal të tipit Pasat në vlerë 10 mijë euro, ndërsa nuk ka detyrime financiare ndonjë banke.
Ministri i Drejtësisë, Abelard Tahiri, ka deklaruar 6 mijë euro të gatshme, 30 mijë euro kredi, ndërsa nuk ka deklaruar të ketë veturë në pronësi.
Ministri i FSK-së, Rrustem Berisha, para të gatshme ka deklaruar mbi 3 mijë euro, kredi më mbi 105 mijë euro dhe veturë të tipit Tauran në vlerë 7500 euro.
Ministri i Infrastrukturës, Pal Lekaj, ka një kredi 75 mijë euro, dy vetura në emër të tij, njëra e tipit BMW në vlerë 20 mijë euro dhe tjetra Mercedes në vlerë 15 mijë euro, kurse nuk ka deklaruar të ketë para të mbajtura në banka.
Ministri i Shëndetësisë, Uran Ismaili, ka deklaruar se së bashku me bashkëshorten kanë një kredi në vlerë prej 33 mijë eurosh, para të gatshme të ruajtura në bankë vetëm 467, kurse nuk posedon veturë private.
Ministri i Kulturës, Rinisë dhe Sportit, Kujtim Gashi, ka deklaruar katër vetura në vlerë prej 34 mijë eurosh dhe para të gatshme në emër personal në vlerë prej 18.691 euro dhe 5200 euro në emër të fëmijëve.
Ministrja për Integrime Evropiane, Dhurata Hoxha, ka deklaruar se posedon veturë në vlerë prej 16900 eurosh, dy mijë euro të gatshme në emër të saj dhe 33 mijë euro në emër të bashkëshortit. Ka deklaruar detyrime financiare në vlerë prej 34 mijë eurosh, të veten dhe të bashkëshortit.
Ministri i Inovacionit dhe Ndërmarrësisë, Besim Beqaj, ka deklaruar dy vetura që arrijnë vlerën e 37 mijë eurove, para të gatshme në emër të tijin prej 12 mijë eurove, ndërsa në pronësi të përbashkët prej 116 mijë eurove. Fëmijët e tij kanë para të gatshme në vlerë prej 26 mijë eurove. Ka kredi në vlerë prej 110 mijë eurove.
Ministri i Arsimit, Shyqiri Bytyqi, ka deklaruar dy vetura në vlerë 30 mijë euro, para të gatshme 10 mijë euro, ndërsa kredi prej 27 mijë eurove.
Ministri i Tregtisë dhe Industrisë, Bajram Hasani, ka deklaruar dy vetura në vlerë 63 mijë euro, 25 mijë euro para të gatshme, ndërsa kredi afër 300 mijë euro, në pronësi të përbashkët.
Ministri për Zhvillim Ekonomik, Valdrin Lluka, ka deklaruar 3 mijë euro të ruajtura në banka, kredi prej 53 mijë eurove, ndërsa nuk ka deklaruar të ketë veturë.
Ministri i Administrimit të Pushtetit Lokal, Ivan Todosijeviç, ka deklaruar veturë në vlerë 8500 euro, 1000 euro para të gatshme, ndërsa nuk ka deklaruar të ketë kredi.
Ministri i Bujqësisë, Pylltarisë dhe Zhvillimit Rural, Nenad Rikallo, ka deklaruar kredi 10 mijë euro, ndërsa sipas deklarimit nuk posedon as veturë dhe as para të gatshme.
Ministri i Administratës Publike, Mahir Yagcilar, ka deklaruar veturë të tipit Renault Modus në vlerë 6 mijë euro, kredi në vlerë 161 mijë euro, ndërsa nuk ka deklaruar para të ruajtura në banka.
Ministri i Zhvillimit Rajonal, Rasim Demiri, ka deklaruar veturë në vlerë 6500 euro, ndërsa sipas deklarimit nuk ka as kredi për të shlyer e as veturë personale.
Në listën e deklarimeve mungon vetë kryeministri Ramush Haradinaj, por edhe dy zv.kryeministrat Behgjet Pacolli, deklarimi i të cilit është ngatërruar dhe Dardan Gashi që nuk figuron as në Ministrinë e Diasporës, ku është edhe ministër.
Mungon edhe deklarimi i pasurisë së disa ministrave, konkretisht ministrit të Financave, Bedri Hamza, ministrit të Punës, Skender Reçica, ministres së Ambientit, Albena Reshitaj, ministrit të Brendshëm Bejtush Gashi, për çka Agjencia Kundërkorrupsion ka thënë se do të përditësojë së shpejti publikimet. /tesheshi.com/
