Nicky Hayden mbylli sytë përgjithmonë dje në moshën 35-vjeçare, i dorëzuar para vdekjes jo nga një aksident tragjik në pistë, siç ndodh zakonisht me pilotët e garave të shpejtësisë, por nga një përplasje fatale me një makinë teksa u jepte pedaleve të biçikletës në rrugët e Italisë.
Ai gjendej prej ditësh në një spital të Çezenës, me dëmtime të rënda në tru. “Kentucky Kid” do ta humbiste këtë betejë, për të mos u kthyer më kurrë në pistë.
Hayden do të shpallej kampion bote në sezonin e 2006-s në Moto GP, aty ku garojnë pilotët më të mirë, si i fundit pilot amerikan që triumfonte në të.
Por merita e tij ishte më shumë se kaq, pasi ai do të ndërpriste rrugëtimin fitues të Valentino Rossi-t, që atë vit kërkonte një titull të gjashtë radhazi.
I lindur më 31 korrik të vitit 1981, në Owensboro, Kentucky, ai do të mbante në vijimësi numrin 69 në motorin e tij, të njëjtin që kishte patur dhe i ati.
Nicky Hayden ishte një kampion i vërtetë, edhe pse nuk e pati kurrë më shkëlqimin e 2006-s në karrierën e mëpastajme. /tesheshi.com/
