Kryetari i Bashkisë së Tiranës, Erjon Veliaj tenton të mbajë një profil të ulët në politikë në këto kohë të nxehta të fushatës elektorale. I gjithë meraku i tij është bllokimi i Këshillit Bashkiak, ku pa votat e LSI-së nuk do të merrte dot vendime.
Veliaj, i cili u investua personalisht në ruajtjen e koalicionit PS-LSI dhe me darkën e famshme të peshkut tek Pazari i ri mes Ramës dhe Metës, ku ai ishte i pranishëm, sot deklaroi se nuk i “intereson politika e madhe”.
I ftuar në UET në një diskutim me studentët, ai tha se është i fokusuar tek punët e vogla të bashkisë dhe u ruajt që të mos jepte asnjë përgjigje që të rezononte me atë që po ndodh sot në skenën politike, ku PS po sulmon LSI-në dhe anasjelltas.
“Bashkia ka vetëm një timon dhe timonin e bashkisë e kam unë, por në Këshillin Bashkiak bashkëpunoj shumë me LSI-në,PDIU-në dhe FRPD-në. Gjithashtu kërkoj konsensusin e PD-së për vendime në interes të qytetit”, tha Veliaj i pyetur për prishjen e aleancës PS-LSI.
Pikërisht sot ai kishte arritur të merrte një votim me konsensus për emërimin e disa rrugëve dhe një shkolle të re tek Bregu i Lumit, që do të quhet “Ardian Klosit” në nder të publicistit dhe mikut të Edi Ramës që u nda nga jeta pak vite më parë. /tesheshi.com/
