Ditët e errëta të Mançester Junajtedit, të nisura që prej largimit të Alex Ferguson-it, po shkojnë drejt fundit të tyre. Dora e Jose Mourinho-s, edhe pse ngadalë e shpesh me pikëpyetje, ka nisur të japë efektet e veta te “djajtë e kuq”, në vuajtje sezonet e fundit.
Dëshmi e përtëritjes së Mançester Junajtedit është fitimi i Ligës së Europës këtë mbrëmje në Stokholm, trofeu i vetëm që i mungonte kësaj skuadre.
E bashkë me këtë trofe, është siguruar dhe pjesëmarrja në Ligën e Kampionëve në sezonin e ardhshëm, në fazën në grupe; një sukses tjetër mjaft domethënës.
Mançester Junajtedi ka dominuar në finalen ndaj një Ajaksi në vështirësi, për shkak të moshës tepër të re të lojtarëve të tij dhe të mungesës së përvojës, aq e domosdoshme në finale të tilla.
Ndeshja u fitua 2-0 nga skuadra angleze, me nga një gol të shënuar në çdo pjesë. Pogba, i përcaktuar dhe lojtari më i mirë i finales, realizoi në minutën e 18-të; Mkhitaryan do ta thellonte rezultatin vetëm tre minuta pas nisjes së pjesës së dytë.
Mourinho deklaronte katër vite më parë se nuk dëshironte ta fitonte Ligën e Europës, dukshëm i etur për trofe më të rëndësishëm, por krejt ndryshe është shfaqur këtë mbrëmje, mjaft i gëzuar.
“Ne gjithmonë menduam se mund ta fitonim Ligën e Europës, e jemi shumë të lumtur. Luajtëm në mënyrë inteligjente… Ishim shumë më të fortë se ata.”
Fitorja e Ligës së Europës nga Mançester Junajtedi i jep fundit mbretërimit trevjeçar në këtë aktivitet të Seviljes, skuadrës spanjolle që e pati bërë të sajin trofeun në tre sezonet e shkuara. /tesheshi.com/
